बारामती : महान्यूज लाईव्ह
सकाळी सहा वाजल्यापासून बारामती मधील विद्या प्रतिष्ठानच्या माहिती आणि तंत्रज्ञान सभागृहासमोर लागलेल्या अभ्यागतांच्या रांगा.. उपमुख्यमंत्र्यांचे आगमन होताच थेट लोकांमध्ये मिसळून प्रत्येकाशी संवाद साधत प्रत्येकाच्या तक्रारींचे निवारण करत पुढे जाणारे अजित दादा…! सर्व लोकांना भेटल्यानंतरच पुन्हा आपल्या कामाकडे निघणारे अजितदादा मागील दोन वर्षात अनेकदा असंख्य लोकांनी पाहिले..! कोरोनाच्या दुसऱ्या लाटेनंतर लोकहित व जन सुरक्षा लक्षात घेऊन थांबलेला हा जनता दरबार आता उद्या रविवारपासून पुन्हा सुरू होतोय..!
रविवारी सकाळी विद्या प्रतिष्ठानच्या सभागृहाबाहेर पुन्हा एकदा जनता दरबार होणार आहे. अजितदादांच्या या अगदी पहाटेपासून सुरू होणाऱ्या जनता दरबाराचे राज्यभरात अनेकदा कौतुक झाले आहे. प्रत्येकाशी थेट संवाद आणि जी कामे जागच्या जागी होऊ शकतात तिथेच निर्णय घेऊन त्या तक्रारीचा निपटारा करण्याचे काम अजित पवार करतात. त्यामुळे फक्त बारामती तालुक्यातील नव्हे, तर आसपासच्या तालुक्यातीलही पदाधिकारी, कार्यकर्ते आणि सामान्य नागरिक अजितदादांना भेटण्यासाठी आवर्जून या जनता दरबारामध्ये येतात.
सूत्रांनी दिलेल्या माहितीनुसार, मागील आठवड्याप्रमाणे उद्यादेखील उपमुख्यमंत्री अजित पवार यांचा भरगच्च दौरा असून बारामती तालुक्यासह दौंड तालुक्यातही भेटी देणार आहेत. सकाळी सहा वाजल्यापासून विकास कामांची पाहणी, त्यानंतर आलेल्या लोकांच्या भेटीगाठी आणि त्यानंतर सार्वजनिक कार्यक्रम असा अजित पवार यांचा उद्याचा दिनक्रम असणार आहे.
तब्बल सहा महिन्यानंतर अजितदादा अधिकृतरित्या जनता दरबारात भेटणार असल्याने लोकांमध्ये देखील उत्सुकता आहे. अर्थात मागील काही दिवसांपासून उपमुख्यमंत्री अजित पवार यांचे सार्वजनिक कार्यक्रम व जाहीर सभा होत असल्याने या ठिकाणीच अजितदादा निवेदन स्वीकारत आहेत. शिवाय राष्ट्रवादीचे तालुकाध्यक्ष संभाजी होळकर आणि त्यांचे पक्षाचे सर्व सहकारी सोमवारी आणि गुरुवारी राष्ट्रवादी पक्ष कार्यालयात थांबून लोकांची निवेदने स्वीकारत होते, अजितदादांचे स्वीय सहाय्यक सुनीलकुमार मुसळे, हनुमंत पाटील हे देखील लोकांना भेटत होतेच, त्यामुळे ही कामे थांबलेली नव्हतीच, परंतु खास निवेदने स्विकारण्यासाठी आणि लोकांना थेट अजितदादांशी संवाद साधण्यासाठी अजितदादा यापूर्वी जो वेळ देत होते, ते आता विद्या प्रतिष्ठानच्या माहिती व तंत्रज्ञानज्ञान सभागृहासमोर पाहायला मिळणार आहे.
