विक्रम वरे : महान्यूज लाईव्ह
बारामती : राज्याचे उपमुख्यमंत्री अजित पवार यांच्या संकल्पनेतून बारामती येथे साकारलेले बसस्थानक आजपासून सुरू करण्यात आले आहे. राज्यातील हे अत्याधुनिक बसस्थानक असून या बसस्थानकासाठी सुमारे ५० कोटी रुपयांचा खर्च करण्यात आला आहे.
हे राज्यातील सर्वात मोठे दुमजली बस स्थानक आहे. या बस स्थानकावर एकाच वेळी २२ बसेस उभ्या राहू शकतात, तर रात्री मुक्कामाला ८० बसेस उभा राहतील अशी व्यवस्था करण्यात आली आहे.
२ मार्च रोजी या बसस्थानकाचे उद्घाटन ज्येष्ठ नेते शरद पवार, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार, बारामतीच्या खासदार सुप्रिया सुळे यांच्या उपस्थितीत ऑनलाईन करण्यात आले होते.
बारामतीत विकासकामे करताना दुरदृष्टी ठेवून केली जातात. बारामती बसस्थानकाबाबतीतही हा अनुभव नागरिकांना येत आहे. उपमुख्यमंत्री अजित पवार यांनी अत्यंत देखणे असे हे बसस्थानक उभारताना त्याचे डिझाईन महाराष्ट्रात नव्हे देशभरात चर्चिले जाईल अशाच स्वरूपाचे तयार केले आणि त्याची उभारणी देखील गुणवत्ता पूर्ण होईल याकडे सातत्याने लक्ष दिले.
दरम्यान आज हे आगार सुरू होताना आगार व्यवस्थापक वृषाली तांबे, आर्किटेक्ट सुनील पाटील, सार्वजनिक बांधकाम विभागाचे अभियंता रामसेवक मुखेकर, घनशाम शिंदे, सचिन गुप्ता यांच्या उपस्थितीत प्रवाशांना गुलाबपुष्प देऊन स्वागत करण्यात आले.
नवीन इमारतीचे काम सुरू असल्याने बसस्थानक तात्पुरत्या स्वरूपात कसब्यात स्थलांतरित करण्यात आले होते. एसटी महामंडळासाठी रोल मॉडेल ठरावे असे हे बसस्थानक आहे. एखाद्या एअरपोर्ट प्रमाणे हे बसस्थानक दिसत असल्याने नागरिकांनी देखील आनंद व्यक्त केला.
