राजेंद्र झेंडे,महान्युज लाईव्ह
दौंड : दौंड शहरातील नगरपरिषदेच्या प्रस्तावित ‘नमो उद्यान’ प्रकल्पाच्या जागेवरून वाद पेटला आहे. नगरसेविका स्वाती नीलेश सावंत यांनी या प्रकरणी जिल्हाधिकारी पुणे व नगरविकास विभागाकडे अधिकृत तक्रार व कायदेशीर आक्षेप घेत याचिका दाखल केली आहे.
नगरसेविका सावंत यांच्या निवेदनानुसार, दौंड शहरातील सि. स. नं. 194 (आरक्षण क्र. 50) या जागेवर उद्यान उभारण्याचा प्रस्ताव हा विकास आराखडा, MRTP Act 1966 आणि शासन निर्णयांचे उल्लंघन करणारा आहे. संबंधित जागा मूळतः ‘टेलिफोन एक्सचेंज’साठी आरक्षित असून उद्यानासाठी मंजूर नाही. माहिती अधिकारातून मिळालेल्या पत्रात मुख्याधिकाऱ्यांनी ही बाब मान्य केली असल्याचा दावा सावंत यांनी केला आहे.
नगरपरिषदेच्या सर्वसाधारण सभेत या विशिष्ट जागेचा उल्लेख न करता लोकप्रतिनिधींना अंधारात ठेवण्यात आले, असा आरोप आहे. मात्र प्रसार माध्यमांमध्ये त्याच जागेवर ‘नमो उद्यान’ उभारण्याबाबत विधाने करण्यात आली. शहरात आधीपासूनच बाग-बगिचे व खुल्या जागांसाठी ११ अधिकृत आरक्षणे उपलब्ध असताना नवीन जागेचा आग्रह धरणे संशयास्पद असल्याचे सावंत म्हणाल्या.
सावंत यांच्या प्रमुख मागण्यांमध्ये प्रस्तावित ‘नमो उद्यान’च्या कामाला तातडीने स्थगिती द्यावी. Change of Land Use (CLU) प्रक्रियेची उच्चस्तरीय चौकशी करावी. विकास आराखड्यानुसार पर्यायी जागेचा विचार करावा. केंद्रीय दूरसंचार विभागाची NOC/छजड ची पडताळणी करावी. जुन्या गावठाण भागात नागरिकांसाठी उद्यान सुविधा उपलब्ध करून द्यावी. आदींचा समावेश आहे.
दरम्यान, या प्रकरणी नगरपरिषद प्रशासनाची बाजू अद्याप समोर आलेली नाही. आरक्षण बदलाच्या प्रक्रियेवरून व ‘नमो उद्यान’च्या नावावरून शहरात राजकीय वातावरण तापले आहे. जिल्हाधिकारी कार्यालयाकडून पुढील कार्यवाहीकडे सर्वांचे लक्ष लागले आहे.
