साहित्यरत्न अण्णाभाऊ साठे महामंडळाचे कर्ज माफ करा : साधू बल्लाळ

बारामती : महान्यूज लाईव्ह

राज्यात महाविकास आघाडीचे सरकार आल्यानंतर खऱ्या अर्थाने सर्वसामान्य जनतेला दिलासा मिळाला आहे. या सरकारने अवघ्या काही दिवसांमध्ये अनेक धोरणात्मक निर्णय घेत सर्वसामान्यांना दिलासा देण्याचे काम केले आहे. मागील काही वर्षात साहित्यरत्न अण्णाभाऊ साठे महामंडळाच्या माध्यमातून कर्ज वाटप करण्यात आले. मात्र देशातील मंदी, नोटबंदी अशा विविध कारणांमुळे मोठ्या प्रमाणात कर्ज थकले आहे. त्यामुळे शासनाने या महामंडळाचे कर्ज माफ करावे अशी मागणी राष्ट्रवादी कॉँग्रेस मागासवर्गीय सेलचे साधू बल्लाळ यांनी केली आहे.

महाविकास आघाडी सरकारचा पहिला अर्थसंकल्प उपमुख्यमंत्री अजित पवार यांनी नुकताच सादर केला. मुख्यमंत्री उद्धव ठाकरे यांच्या नेतृत्वाखालील या सरकारने समाजातील सर्वच घटकांना दिलासा देणारे निर्णय जाहीर केले आहेत. त्याचबरोबर अर्थसंकल्पातही अनेक धोरणात्मक बाबींसाठी निधीची तरतूद केली आहे. या पार्श्वभूमीवर राज्य शासनाने साहित्यरत्न अण्णाभाऊ साठे महामंडळाला भरीव निधी देतानाच मागील कर्ज माफ करावे अशी मागणी साधू बल्लाळ यांनी केली आहे.

मागील काही वर्षात केंद्र सरकारच्या नोटबंदीसारख्या चुकीच्या निर्णयांचा परिणाम सामान्यांवर झाला असून सध्या प्रचंड मंदी निर्माण झाली आहे. त्यामुळे अण्णाभाऊ साठे महामंडळातील कर्ज माफ करून सर्वसामान्यांना दिलासा देण्याचा प्रयत्न शासनाच्या माध्यमातून व्हावा, तसेच या महामंडळाला अधिकचा निधी मिळावा यासाठी आपण उपमुख्यमंत्री अजित पवार यांची भेट घेणार असल्याचेही साधू बल्लाळ यांनी सांगितले आहे.