बारामती : आगामी गणेशोत्सवाच्या पार्श्वभूमीवर बारामती शहरासह पुणे ग्रामीण पोलिसांकडून कायदा व सुव्यवस्था अबाधित ठेवण्यासाठी व्यापक नियोजन करण्यात आले आहे. गणेश मंडळांच्या पदाधिकाऱ्यांच्या बैठका घेऊन उत्सव शांततेत आणि सुरक्षित वातावरणात पार पाडण्यासाठी आवश्यक त्या सूचना पोलिस प्रशासनाकडून देण्यात आल्या आहेत.
गणेशोत्सव काळात डीजे आणि ध्वनिवर्धकाच्या वाढत्या आवाजाचा मुद्दा दरवर्षी चर्चेत येतो. यंदाही ध्वनिप्रदूषणाबाबत पोलिस प्रशासनाने स्पष्ट भूमिका घेतली असून, सर्वोच्च न्यायालयाने निर्धारित केलेल्या ध्वनी मर्यादेचे काटेकोर पालन करण्याचे आवाहन पोलीस अधीक्षक संदीप सिंह गिल्ल यांनी गणेश मंडळांना केले आहे. विशेषतः नवजात बालके, ज्येष्ठ नागरिक तसेच आजारी व्यक्तींना मोठ्या आवाजाचा त्रास होऊ नये, याची काळजी घेण्याचे आवाहन करण्यात आले आहे.
उत्सवाच्या काळात गर्दीच्या ठिकाणी अनुचित प्रकार घडू नयेत यासाठी गणेश मंडळांनी मंडप परिसरात सीसीटीव्ही कॅमेरे बसवावेत, अशी सूचना पोलिसांनी केली आहे. महिला आणि मुलींच्या सुरक्षेला विशेष प्राधान्य देतानाच गर्दीच्या ठिकाणी संशयास्पद हालचाली आढळल्यास तत्काळ पोलिसांना माहिती देण्याचे आवाहन करण्यात आले आहे.
गणेशोत्सवाच्या माध्यमातून सायबर गुन्हे आणि अमली पदार्थांच्या विरोधात जनजागृती करण्यावरही पोलिसांनी भर दिला आहे. मंडळांनी सामाजिक उपक्रमांच्या माध्यमातून नागरिकांमध्ये सुरक्षिततेबाबत जागरूकता निर्माण करावी, असे आवाहन करण्यात आले आहे.
दरम्यान, गणेश मंडळांना विविध शासकीय परवानग्या मिळविताना होणारी धावपळ कमी करण्यासाठी बारामती शहरात सिंगल विंडो पद्धतीची व्यवस्था करण्यात आली आहे. त्यामुळे आवश्यक परवानग्यांची प्रक्रिया अधिक सुलभ होण्याची अपेक्षा आहे.
गणेशोत्सवादरम्यान शहरातील संवेदनशील ठिकाणे, गर्दीची ठिकाणे आणि विसर्जन मार्गांवर पोलिसांची विशेष नजर राहणार असून, आवश्यकतेनुसार अतिरिक्त मनुष्यबळ तैनात केले जाणार आहे. उत्सवाचा आनंद घेताना कायदा व सुव्यवस्थेला बाधा येणार नाही, याची जबाबदारी गणेश मंडळांसह नागरिकांनीही घ्यावी, असे पोलिस प्रशासनाने स्पष्ट केले आहे.
