डॉ.संदेश शहा पुणे, दि. ७ : चार दशकांपूर्वी वैद्यकीय शिक्षणाची सुरुवात करून जीवनाच्या विविध क्षेत्रांत आपला ठसा उमटविणाऱ्या डी. एस. होमिओपॅथी मेडिकल कॉलेजच्या १९८६च्या प्रवेश बॅचने यंदाचा शिक्षकदिन आगळ्यावेगळ्या पद्धतीने साजरा केला. या बॅचमधील माजी विद्यार्थ्यांनी आपल्या तत्कालीन शिक्षकांच्या आठवणी जागवत त्यांना ७०० हून अधिक विशेष पोस्टकार्डे पाठवून कृतज्ञता व्यक्त केली.
पुण्यातील डॉ. दीपाली शाह आणि अहमदाबाद येथील डॉ. शिवांग स्वामिनारायण यांच्या संकल्पनेतून हा उपक्रम राबविण्यात आला. चार दशकांचा कालावधी उलटून गेल्यानंतरही ज्या शिक्षकांनी आपल्या आयुष्याला दिशा दिली, त्यांच्या ऋणाची आठवण ठेवत पुन्हा एकदा गुरु-शिष्य नाते भावनिक पातळीवर जोडण्याचा या उपक्रमामागील उद्देश होता.
तत्कालीन प्राचार्य डॉ. एम. पी. आर्य यांच्यासह त्या काळातील शिक्षकवृंदाप्रती माजी विद्यार्थ्यांनी कृतज्ञता व्यक्त केली. महाराष्ट्रातील विविध शहरांबरोबरच अहमदाबाद, दिल्ली तसेच अमेरिका, जर्मनी आणि कॅनडा येथे स्थायिक झालेल्या माजी विद्यार्थ्यांनीही या उपक्रमात सहभाग घेतला. विशेष डिझाइन केलेल्या पोस्टकार्डांवर प्रत्येकाने आपल्या शिक्षकांसाठी स्वतःच्या हस्ताक्षरात संदेश लिहून ते पोस्ट केले.
डिजिटल युगात पोस्टकार्डची निवड
आज संवादासाठी व्हॉट्सॲप, ई-मेल आणि सोशल मीडिया यांसारखी डिजिटल माध्यमे सहज उपलब्ध असताना या बॅचने मात्र पोस्टकार्डाचा पर्याय निवडला. हस्तलिखित शब्दांमधील आपलेपणा, आठवणी जपून ठेवण्याची क्षमता आणि संदेशाला मिळणारा वैयक्तिक स्पर्श यामुळे पोस्टकार्ड माध्यमाला प्राधान्य देण्यात आले. १९८६ ते २०२६ या ४० वर्षांच्या प्रवासाच्या आठवणींना या पोस्टकार्डांनी उजाळा दिला. शिक्षकदिनाच्या शुभेच्छा देण्यापलीकडे जाऊन माजी विद्यार्थ्यांनी आपल्या शिक्षकांनी घडविलेल्या जीवनप्रवासाबद्दल मनापासून कृतज्ञता व्यक्त केली.
९५ माजी विद्यार्थी, विविध क्षेत्रांत योगदान
१९८६ ची ही बॅच आज ९५ माजी विद्यार्थ्यांचा समूह आहे. वैद्यकीय व्यवसाय, शिक्षण, संशोधन, आरोग्यसेवा, सामाजिक कार्य तसेच विविध व्यावसायिक क्षेत्रांत कार्यरत असलेल्या या विद्यार्थ्यांनी आपल्या कामातून महाविद्यालयाचे नाव उंचावले आहे.
पुण्यातील डॉ. रणजित देशमुख हे न्यूरोसर्जन म्हणून कार्यरत आहेत. होमिओपॅथीतील पदवी शिक्षणानंतर त्यांनी रशियातून मास्टर्स इन सर्जरीचे शिक्षण घेतले असून न्यूरोसर्जरीमध्ये डीएनबी प्राप्त केले आहे.
डॉ. दीपाली शाह पुण्यात कौटुंबिक वैद्य म्हणून दीर्घकाळ सेवा देत असून सहजीवन वृद्धाश्रमासह विविध सामाजिक उपक्रमांमध्येही सहभागी आहेत.
अहमदाबाद येथील डॉ. शिवांग स्वामिनारायण हे होमिओपॅथी, उद्योग, संशोधन, आयुष व स्वास्थ्य धोरण, व्यावसायिक संघटना आणि सामाजिक आरोग्य क्षेत्रात कार्यरत आहेत. गुजरातच्या राज्यपालांचे मानद चिकित्सक (होमिओपॅथी) म्हणूनही ते कार्यरत आहेत.
या बॅचचे काही माजी विद्यार्थी परदेशातही कार्यरत आहेत. जर्मनीतील डॉ. अल्पना गांधी आणि लॉस एंजेलिस, अमेरिका येथील डॉ. सचिन देशमुख यांनीही पोस्टकार्ड उपक्रमात सहभाग नोंदविला.
शिक्षकांचे योगदान केवळ अभ्यासक्रमापुरते मर्यादित नाही
वैद्यकीय शिक्षण देताना शिक्षकांची भूमिका केवळ अभ्यासक्रम पूर्ण करण्यापुरती मर्यादित राहत नाही. रुग्णांप्रती संवेदनशीलता, व्यावसायिक मूल्ये, शिस्त, क्लिनिकल विचारसरणी आणि जबाबदारीची जाणीव विद्यार्थ्यांमध्ये रुजविण्यात शिक्षकांचा मोठा वाटा असतो. चार दशकांनंतर पाठविण्यात आलेली ७०० हून अधिक पोस्टकार्डे ही त्या संस्कारांप्रती व्यक्त केलेली कृतज्ञता असल्याची भावना माजी विद्यार्थ्यांनी व्यक्त केली.
चार दशके, ९५ बॅचमेट्स, ७०० हून अधिक पोस्टकार्डे आणि एकच भावना—आमच्या आयुष्याला दिशा देणाऱ्या शिक्षकांप्रती कृतज्ञता, अशी भावना या उपक्रमातून व्यक्त झाली. डिजिटल संवादाच्या काळातही हस्तलिखित शब्द, जुन्या आठवणी आणि गुरु-शिष्य नात्याचे महत्त्व कायम असल्याचा संदेश या अनोख्या उपक्रमातून देण्यात आला आहे.
