बारामती : महान्यूज लाईव्ह
बारामती तालुका मराठा सेवा संघ प्रणित जिजाऊ सेवा संघाच्या वतीने नवरात्रोत्सवानिमित्त महिलांसाठी आयोजित करण्यात आलेल्या विशेष पाककला स्पर्धेला महिलांचा उत्स्फूर्त प्रतिसाद मिळाला. या स्पर्धेत गोड पदार्थ प्रकारात डॉ. योगिता शिंदे-शेरखान यांनी, तर तिखट पदार्थ प्रकारात सोनाली नेवसे यांनी प्रथम क्रमांक पटकावत बाजी मारली. सोमवारी आयोजित या स्पर्धेत महिलांनी उपवासाचे वैविध्यपूर्ण गोड आणि तिखट पदार्थ सादर करत आपल्या कल्पकतेची व पाककौशल्याची चुणूक दाखवली.
स्पर्धेच्या गोड पदार्थ बनविणे प्रकारात डॉ. योगिता शिंदे-शेरखान यांनी प्रथम, स्वाती महामुनी यांनी द्वितीय, सुषमा लोंढे यांनी तृतीय, तर वर्षा जाधव यांनी चतुर्थ क्रमांक पटकावला. तसेच छाया पाटील, भावना धर्माधिकारी व मानसी दुरुगकर यांनी अनुक्रमे पाचवा, सहावा व सातवा क्रमांक मिळवला. तर तिखट पदार्थ बनविणे स्पर्धेत सोनाली नेवसे यांनी प्रथम, सुप्रिया पाटील यांनी द्वितीय, धनश्री राऊत यांनी तृतीय, तर किरण जाधव यांनी चतुर्थ क्रमांक मिळवला. दर्शना शहा, पुष्पावती भोसले आणि निकिता पानसांडे यांनी अनुक्रमे पाचवा, सहावा व सातवा क्रमांक पटकावला.
नवरात्रोत्सवात बहुतांश महिलांचे उपवास असतात. त्यामुळे उपवासाचे चवदार व पौष्टिक गोड-तिखट पदार्थ बनवण्याची कला अवगत व्हावी, नोकरदार, व्यावसायिक व गृहिणींना पारंपरिक आणि नवनवीन पदार्थांची माहिती मिळावी तसेच महिलांच्या सुप्त कलागुणांना हक्काचे व्यासपीठ लाभावे, या उद्देशाने या स्पर्धेचे आयोजन करण्यात आले होते, असे जिजाऊ सेवा संघाच्या अध्यक्षा स्वाती ढवाण यांनी सांगितले. या स्पर्धेमुळे सादरीकरणाची उत्तम संधी मिळून आत्मविश्वास वाढल्याची भावना विजेत्या डॉ. योगिता शिंदे व सोनाली नेवसे यांनी व्यक्त केली. सुवर्णा जोशी व मोनिका आगवणे यांनी स्पर्धेचे परीक्षक म्हणून काम पाहिले.
या कार्यक्रमास माजी नगराध्यक्षा जयश्री सातव, मराठा सेवा संघाचे तालुकाध्यक्ष नामदेव तुपे, बारामती बँकेचे संचालक देवेंद्र शिर्के, डॉ. सुहासिनी सातव, विजया कदम, शारदा खराडे, सीमा चव्हाण, अंजली संगई आदींसह जिजाऊ सेवा संघाच्या अध्यक्षा स्वाती ढवाण, मनीषा शिंदे, सुनंदा जगताप, संगीता साळुंखे, कल्पना माने, भारती शेळके, मनीषा खेडेकर, गौरी सावळे-पाटील, वंदना जाधव, सुवर्णा केसकर, ऋतुजा नलावडे, विणा यादव, पूजा खलाटे, अमृता सूर्यवंशी यांच्यासह महिला मोठ्या संख्येने उपस्थित होत्या. कार्यक्रमाचे सूत्रसंचालन गौरी पाटील व संगीता साळुंखे यांनी केले, तर आभार मनीषा शिंदे यांनी मानले.
