बारामती : सन २०२१ मध्ये दाखल झालेल्या मारहाण व धमकीच्या गुन्ह्यात न्यायालयीन प्रक्रियेला सातत्याने गैरहजर राहणाऱ्या वॉरंटधारक आरोपीला अखेर बारामती शहर पोलिसांनी कसबा परिसरातून अटक केली. देवेंद्र रामचंद्र घोडके असे अटक करण्यात आलेल्या आरोपीचे नाव असून, त्याला न्यायालयासमोर हजर केले असता न्यायालयाने न्यायालयीन कोठडी सुनावली. त्यानंतर त्याची कारागृहात रवानगी करण्यात आली.
बारामती शहर पोलीस ठाण्यात गुन्हा रजिस्टर क्रमांक ५४२/२०२१ अन्वये भारतीय दंड संहिता कलम ३२४, ५०४, ५०६ व ३४ नुसार गुन्हा दाखल आहे. फिर्यादीनुसार, ८ ऑक्टोबर २०२१ रोजी खंडोबानगर परिसरात रस्त्यावर ठेवलेला लोखंडी रॅक बाजूला करण्यावरून वाद झाला होता. या वादातून आरोपीने कुकरने फिर्यादीच्या डोक्यात मारहाण केल्याने दुखापत झाली, तसेच शिवीगाळ व धमकी दिल्याचा आरोप आहे. यानंतर लोखंडी कोयता घेऊन फिर्यादीच्या दिशेने धावून आल्याचेही तक्रारीत नमूद आहे.
गुन्हा दाखल झाल्यानंतर न्यायालयीन कार्यवाही सुरू असताना आरोपी नियमितपणे हजर राहत नसल्याने त्याच्याविरुद्ध समन्स व अटक वॉरंट बजावण्याची प्रक्रिया करण्यात आली होती. मात्र, तो पोलिसांच्या हाती लागत नव्हता. प्रलंबित वॉरंटच्या अनुषंगाने पोलीस उपनिरीक्षक सर्जेराव पुजारी व पोलीस हवालदार उदय टापरे यांनी आरोपीच्या हालचालींबाबत माहिती संकलित केली. तो कसबा परिसरातून जाणार असल्याची खात्रीशीर माहिती मिळाल्यानंतर पोलिसांनी सापळा रचून त्याला ताब्यात घेतले.
ही कारवाई पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार व उपविभागीय पोलीस अधिकारी चैतन्य कदम यांच्या मार्गदर्शनाखाली, प्रभारी पोलीस निरीक्षक श्रीशैल चिवडशेट्टी यांच्या नेतृत्वाखाली करण्यात आली. पथकात पोलीस उपनिरीक्षक सर्जेराव पुजारी, पोलीस हवालदार उदय टापरे, पोलीस शिपाई अक्षय सिताफ, पोलीस हवालदार रामचंद्र शिंदे व महिला पोलीस शिपाई भाग्यश्री देवकाते यांचा समावेश होता. न्यायालयीन आदेशाचे पालन करणे आवश्यक असून, वॉरंट टाळून कायदेशीर प्रक्रियेपासून दूर राहण्याचा प्रयत्न करणाऱ्यांचा शोध घेऊन त्यांना न्यायालयासमोर हजर केले जाईल, असा इशारा पोलिसांनी दिला आहे.
