इंदापूर : महान्यूज लाईव्ह
इंदापूर : उजनीच्या प्रस्तावित मासेमारी ठेकेदारी पद्घतीला स्थानिक मच्छिमार व भूमिपुत्रांचा विरोध दिवसेंदिवस वाढत चालला असुन, शासनाचे लक्ष वेधण्यासाठी उद्या सोमवारी (दि.७ रोजी) उजनीकाठच्या ४० गावातील ग्रामपंचायतसमोर स्थानिक मच्छिमार एक दिवसीय लाक्षणिक उपोषणास बसणार आहेत.
उजनी मच्छिमार बचाव अभियानाच्या वतीने हे एक दिवसीय लाक्षणिक उपोषण धरण्यात येणार आहे. उजनी जलाशयातील मासेमारी व्यवसायावर हजारो कुटुंबाचा उदरनिर्वाह अवलंबून आहे. पारंपरिक भोई, कोळी तसेच धरणग्रस्त, पारधी, मागासवर्गीय लोकांना या व्यवसायातून चांगला रोजगार उपलब्ध होतो आहे.
मात्र कृष्णा खोरे विकास महामंडळाने गेल्या महिन्यात ई टेंडर प्रक्रिया सुरू करायचा धरणातील मच्छिमार अस्वस्थ झाला आहे. यावेळी केवळ मच्छिमारांच्या उदरनिर्वाहाचा प्रश्न नाही तर व्यापारी, आडतदार, हॉटेल चालक, वाहन चालक, मालक, जाळी दुकानदार,बर्फ कारखानदार यांच्यावरही संकट घोंगावत असल्याचा आरोप होत आहे.
यावरून सध्या मच्छिमारांनी आंदोलनाचे हत्यार उपसले आहे. उजनी मच्छिमार अभियानाच्या वतीने या ठेकेदारी पद्धतीला कडाडून विरोध केला आहे. या पार्श्वभूमीवर उद्या सोमवारी ४० हून अधिक गावातील ग्रामपंचायत समोर हे मच्छिमार एक दिवसाचे लाक्षणिक उपोषण धरणार आहेत. या माध्यमातून शासनापर्यंत हा आवाज पोहचवण्याचा निर्धार असल्याचे सांगण्यात आले, तर १५ सप्टेंबर रोजी पुणे येथील कृष्णा खोरे विकास महामंडळाच्या कार्यालयासमोर मच्छिमार प्राणांतिक उपोषणास बसणार आहेत.
यासाठी हजारो मच्छिमार उपोषणास पाठींबा देण्यासाठी पुण्याकडे जाणार असल्याची माहिती विक्रम शेलार, चंद्रकांत भोई, बाळासाहेब काळे, उज्वला परदेशी, अनिल नगरे, बापुराव भोई, बलभीम भोई, दत्तात्रय व्यवहारे, संजय दरदरे, अमोल कांबळे, युवराज नगरे, सोमनाथ शेटे, अंगत सर आदींनी दिली आहे.
