इंदापूर, दि. २५ : सेवाभाव, प्रसंगावधान आणि कर्तव्यनिष्ठेचे उत्तम उदाहरण ठरलेल्या एका घटनेत इंदापूर तालुक्यातील काटी येथील प्राथमिक आरोग्य केंद्रात कार्यरत असलेल्या पर्यवेक्षिका (एएनएम) श्रीमती भोंडे यांनी धावत्या रेल्वेमध्ये एका गरोदर महिलेची सुरक्षित प्रसूती करून आई व बाळाचे प्राण वाचविले.
मिळालेल्या माहितीनुसार, जिल्हा गोंदिया येथील रहिवासी तथा काटी प्राथमिक आरोग्य केंद्रात कार्यरत असलेल्या श्रीमती भोंडे या २४ जून २०२६ रोजी सकाळी नागपूर ते मुंबई सुपरफास्ट एक्स्प्रेसने प्रवास करत होत्या. यावेळी रेल्वेमधील एका गरोदर महिलेला अचानक प्रसूतीवेदना सुरू झाल्या. पुढील रेल्वे स्थानक येण्यासाठी बराच वेळ असल्याने परिस्थिती गंभीर बनली होती.
अशा वेळी कोणतीही वैद्यकीय सुविधा उपलब्ध नसताना श्रीमती भोंडे यांनी प्रसंगावधान राखत आणि आपल्या आरोग्य सेवेतील अनुभवाचा उपयोग करत धाडसाने जबाबदारी स्वीकारली. धावत्या रेल्वेमध्ये अत्यंत प्रतिकूल परिस्थितीत त्यांनी महिलेची यशस्वी आणि सुरक्षित प्रसूती केली. त्यांच्या तत्परतेमुळे आई व नवजात बाळ दोघेही सुखरूप असून बाळाचे या जगात सुरक्षित आगमन झाले. या घटनेमुळे रेल्वेतील प्रवाशांनीही सुटकेचा नि आनंदाचा श्वास घेतला.
श्रीमती भोंडे यांनी दाखविलेली कर्तव्यनिष्ठा, मानवता आणि जनसेवेची भावना ही संपूर्ण आरोग्य विभागासाठी अभिमानास्पद असून सर्व आरोग्य कर्मचाऱ्यांसाठी प्रेरणादायी ठरली आहे. त्यांच्या या उल्लेखनीय कार्याचे सर्व स्तरांतून कौतुक होत असून, आरोग्य सेवेतील कर्मचारी कोणत्याही परिस्थितीत समाजाच्या सेवेसाठी तत्पर असतात, याची पुन्हा एकदा प्रचिती या घटनेतून आली आहे. आरोग्य क्षेत्रातील अशा समर्पित कर्मचाऱ्यांमुळेच समाजाचा आरोग्य व्यवस्थेवरील विश्वास अधिक दृढ होत असून, श्रीमती भोंडे यांच्या या कार्याबद्दल सर्व स्तरांतून त्यांचे अभिनंदन व कौतुक करण्यात येत आहे.
