मुंबई : महान्यूज लाईव्ह
राज्याच्या प्रशासनिक व्यवस्थेला अधिक सक्षम आणि गतिमान करण्याच्या दृष्टीने महाराष्ट्र सरकारने एक महत्त्वपूर्ण पाऊल उचलले आहे. मुंबईतील नरिमन पॉईंट परिसरात समुद्रकिनाऱ्यालगत उभी असलेली एअर इंडियाची २३ मजली ऐतिहासिक इमारत तब्बल १,६०१ कोटी रुपयांना खरेदी करण्यात आली असून, येत्या काळात राज्य सरकारचे विविध विभाग या ठिकाणी कार्यरत होण्याचा मार्ग मोकळा झाला आहे.
सध्या मंत्रालयात जागेची मोठी कमतरता असून अनेक महत्त्वाचे शासकीय विभाग आणि कार्यालये मुंबईतील विविध ठिकाणी भाडेतत्त्वावर किंवा स्वतंत्र इमारतींमध्ये कार्यरत आहेत. त्यामुळे नागरिकांना एका कामासाठी अनेक कार्यालयांचे उंबरठे झिजवावे लागतात. विभाग वेगवेगळ्या ठिकाणी असल्यामुळे प्रशासकीय समन्वयावरही त्याचा परिणाम होत असल्याचे चित्र आहे.
या पार्श्वभूमीवर एअर इंडियाच्या या भव्य इमारतीची खरेदी राज्य सरकारसाठी दीर्घकालीन दृष्टीने महत्त्वाची मानली जात आहे. मंत्रालयाच्या जवळच असलेल्या या इमारतीत अनेक विभाग स्थलांतरित झाल्यानंतर प्रशासन अधिक संघटित, सुलभ आणि वेगवान होण्यास मदत होणार आहे.
दरम्यान, मंत्रालय परिसरात मंत्र्यांसाठी स्वतंत्र नवीन इमारतीचे काम अंतिम टप्प्यात आहे. ही इमारत पूर्ण झाल्यानंतर विद्यमान मंत्रालयातील काही जागा मोकळी होणार असून ती इतर विभाग आणि कार्यालयांच्या कामकाजासाठी उपलब्ध होणार आहे. त्यामुळे मंत्रालय आणि नव्याने खरेदी केलेली एअर इंडिया इमारत मिळून राज्याच्या प्रशासनाचे एक मोठे केंद्रीकृत जाळे तयार होणार आहे.
विशेष म्हणजे, मुंबईच्या ओळखीचा अविभाज्य भाग असलेली आणि अनेक दशकांचा इतिहास जपणारी एअर इंडियाची ही वास्तू आता नव्या रूपात महाराष्ट्राच्या प्रशासकीय व्यवस्थेची साक्षीदार ठरणार आहे. एकीकडे ऐतिहासिक वास्तूचे जतन करताना दुसरीकडे नागरिकांना अधिक वेगवान आणि सोयीस्कर शासकीय सेवा देण्याचा सरकारचा प्रयत्न या निर्णयातून दिसून येत आहे.
