विक्रम वरे : महान्यूज लाईव्ह
माळेगांव : माळेगाव सहकारी साखर कारखान्याने आगामी गळीत हंगाम २०२६-२७ यशस्वीपणे आणि वेळेत सुरू करण्याच्या दृष्टीने महत्त्वपूर्ण पाऊल उचलले आहे.कारखान्याच्या इंजिनिअरिंग विभागाकडील मिल रोलर पूजनाचा कार्यक्रम गुरुवार १८ रोजी सकाळी संपन्न झाला.या पूजन सोहळ्यामुळे कारखान्याच्या हंगामपूर्व तयारीला अधिकृत सुरुवात झाल्याचे मानले जात आहे.
राज्याच्या उपमुख्यमंत्री तथा कारखान्याच्या चेअरमन सुनेत्रा अजितदादा पवार यांच्या सूचनेनुसार व्हा.चेअरमन संगीताताई कोकरे यांच्या हस्ते उपस्थितीत विधिवत पूजन करण्यात आले.यावेळी नवीन मिल रोलर सज्ज करण्यात आले असून आगामी हंगामासाठी आवश्यक यंत्रसामग्रीची तयारी अंतिम टप्प्यात पोहोचल्याचे सांगण्यात आले.
कारखान्याचा गळीत हंगाम वेळेत सुरू व्हावा यासाठी सर्व विभागप्रमुखांनी आपल्या विभागातील कामांचा आढावा घेतला आहे. दुरुस्ती, देखभाल व तांत्रिक कामे नियोजित वेळेत पूर्ण करण्याच्या सूचना संचालक मंडळाने दिल्या आहेत. कारखान्याचे व्हाईस चेअरमन आणि संचालक मंडळाने यंदाच्या हंगामात १३ लाख मेट्रिक टन ऊस गाळपाचे उद्दिष्ट ठेवले असल्याची माहिती यावेळी देण्यात आली.
हंगाम २०२६-२७ साठी कारखान्याच्या कार्यक्षेत्रात सुमारे १९ हजार ५०० एकर क्षेत्रावर ऊस उपलब्ध असल्याचे सांगण्यात आले. त्यातून अंदाजे ७ लाख मेट्रिक टन ऊस सभासदांकडून उपलब्ध होणार आहे.याशिवाय विविध गेटकेन करारांद्वारे अतिरिक्त ऊस कारखान्याकडे येण्याची अपेक्षा व्यक्त करण्यात आली आहे.त्यामुळे कारखान्याचे गाळप उद्दिष्ट पूर्ण करण्यासाठी पुरेसा ऊस उपलब्ध राहणार आहे.
ऊस तोडणी व वाहतुकीसाठी आवश्यक यंत्रणांची उभारणी देखील पूर्णत्वाकडे आली आहे.चालू वर्षात १,२०० बैलगाडी, ५७० ट्रॅक्टरगाडी,४०० ट्रक-ट्रॅक्टर तसेच १५ हार्वेस्टर यंत्रांचे करार पूर्ण झाल्याची माहिती प्रशासनाने दिली.त्यामुळे ऊस वाहतुकीचे नियोजन अधिक प्रभावीपणे होणार असून शेतकऱ्यांना वेळेत ऊस तोडणीची सुविधा मिळणार आहे.
या वेळी व्हाईस चेअरमन संगीताताई कोकरे, ज्येष्ठ संचालक बाळासाहेब तावरे, शिवराज जाधवराव, राजेंद्र बुरुंगले, तानाजी कोकरे, योगेश जगताप, स्वप्नील जगताप, गणपत खलाटे, विजय तावरे, प्रताप आटोळे, सतीश फाळके, अविनाश देवकाते, जयपाल देवकाते, देविदास गावडे, नितीन सातव, रत्नकुमार भोसले, ज्योती मुलमुले, नितीन शेंडे, विलास देवकाते, दत्तात्रय येळे, रामदास आटोळे, विशाल जगताप, कामगार संचालक चंद्रशेखर जगताप, प्रभारी कार्यकारी संचालक श्रीकांत पाटील, वर्क्स मॅनेजर अनिल वाबळे यांच्यासह विभागप्रमुख, कर्मचारी, सभासद व ऊस उत्पादक शेतकरी मोठ्या संख्येने उपस्थित होते.
मिल रोलर पूजनानंतर कारखान्याच्या आगामी गळीत हंगामाच्या तयारीला अधिक गती मिळाली असून, यंदा विक्रमी गाळपाचे उद्दिष्ट साध्य करण्यासाठी प्रशासन, संचालक मंडळ आणि ऊस उत्पादक शेतकरी यांचे समन्वयाने प्रयत्न सुरू असल्याचे चित्र दिसून येत आहे. कारखान्याच्या कार्यक्षेत्रातील शेतकऱ्यांमध्येही आगामी हंगामाबाबत उत्साहाचे वातावरण निर्माण झाले आहे.
