बारामती : महान्यूज लाईव्ह
महाराष्ट्राच्या राजकारणात “कामाचा माणूस” अशी ओळख निर्माण करून आपल्या कार्याचा अढळ ठसा उमटवणारे उपमुख्यमंत्री अजित पवार यांच्या जीवनप्रवासातील अनमोल क्षण जतन करण्यासाठी एक भावपूर्ण आणि महत्त्वाकांक्षी उपक्रम हाती घेण्यात आला आहे. त्यांच्या सार्वजनिक जीवनातील कार्य, निर्णयक्षमता, प्रशासनातील पकड आणि जनतेशी असलेले स्नेहबंध यांचे दस्तऐवजीकरण व्हावे, या उद्देशाने छायाचित्रे आणि चित्रफिती संकलित करण्याचे आवाहन करण्यात आले आहे.
गेल्या चार दशकांहून अधिक काळ अजितदादांनी राजकीय आणि सामाजिक क्षेत्रात अथक परिश्रम घेतले. पहाटे सहा वाजल्यापासून सुरू होणारी त्यांची कामाची धावपळ रात्री उशिरापर्यंत अखंड सुरू असायची. मंत्रालयातील बैठका, जिल्हा दौर्यांदरम्यान घेतलेले आढावे, विकासकामांची पाहणी, कार्यकर्त्यांशी थेट संवाद आणि सर्वसामान्य नागरिकांच्या समस्या ऐकून त्यावर तत्काळ उपाययोजना करण्याची त्यांची कार्यशैली विशेष ठरली. विकासासाठीची त्यांची तळमळ आणि निर्णयक्षम नेतृत्व यामुळे राज्यातील विविध पायाभूत प्रकल्पांना गती मिळाली.
अजितदादांच्या कार्यकर्त्यांकडे, सहकाऱ्यांकडे, स्नेहीजनांकडे आणि मित्रपरिवाराकडे त्यांच्या राजकीय आणि सामाजिक जीवनातील अनेक संस्मरणीय क्षण छायाचित्रे किंवा व्हिडिओच्या स्वरूपात जतन झालेले असतील. या सर्व आठवणी एकत्रित करून त्यांचा समृद्ध असा ऐतिहासिक दस्तऐवज तयार करण्याचा मानस आहे. त्यामुळे राज्यातील तसेच राज्याबाहेरील त्यांच्या चाहत्यांना आणि समर्थकांना त्यांच्या कार्याचा प्रवास पुन्हा अनुभवता येईल.
आपल्याकडे उपलब्ध असलेली एचडी गुणवत्तेतील छायाचित्रे व चित्रफिती कृपया ourdada@viitindia.org या ई-मेल आयडीवर पाठवावीत किंवा अधिक माहितीसाठी ८८७९८८७००९ या भ्रमणध्वनी क्रमांकावर पाठवा व संपर्क करा!
या उपक्रमामुळे अजितदादांच्या कार्याचा प्रेरणादायी वारसा पुढील पिढ्यांपर्यंत पोहोचेल आणि त्यांच्या सार्वजनिक जीवनातील योगदानाचे जतन भावी काळासाठी होईल. त्यांच्या कार्याचा ठसा इतिहासात अधिक ठळकपणे उमटावा आणि त्यांच्या आठवणी चिरंतन राहाव्यात, यासाठी सर्वांनी उत्स्फूर्त सहभाग नोंदवावा, असे आवाहन उपमुख्यमंत्री कार्यालयाचे विशेष कार्य अधिकारी सुनील मुसळे यांनी केले आहे.
