पुणे : महान्यूज लाईव्ह
व्याजाने घेतलेली रक्कम पूर्णपणे परत करूनही एका २८ वर्षीय महिलेचा छळ करत तिच्यावर अत्याचार करून अश्लील व्हिडिओ तयार केल्याचा आणि ते व्हायरल करण्याची धमकी देत खोटा गुन्हा दाखल करण्यासाठी दबाव टाकल्याचा संतापजनक प्रकार भारती विद्यापीठ पोलीस ठाण्याच्या हद्दीत उघडकीस आला आहे. या प्रकरणी पोलिसांनी पती-पत्नीला अटक केली असून एका वकिलासह एकूण सात जणांविरोधात गुन्हा दाखल करण्यात आला आहे.
अटक करण्यात आलेल्यांची नावे प्रताप रमेश जाधव (वय ४५) आणि पल्लवी दादासो कारंडे उर्फ पल्लवी प्रताप जाधव (वय २८, दोघे रा. भिंताडेनगर, सिंहगड कॅम्प) अशी आहेत. याप्रकरणी पीडित महिलेने भारती विद्यापीठ पोलीस ठाण्यात फिर्याद दिली आहे. हा प्रकार जून २०२४ पासून आतापर्यंत सुरू असल्याचे तपासात समोर आले आहे.
पोलिसांनी दिलेल्या माहितीनुसार, फिर्यादी महिला आणि आरोपी पल्लवी जाधव या एकमेकींच्या परिचयातील आहेत. आर्थिक गरजेतून फिर्यादीने प्रताप जाधव याच्याकडून सुमारे अडीच लाख रुपये व्याजाने घेतले होते. संबंधित रक्कम व्याजासह परत करण्यात आली होती. मात्र, पैसे परत करूनही आरोपींकडून वारंवार पैशांची मागणी करून मानसिक त्रास दिला जात होता.
फिर्यादीच्या तक्रारीनुसार, पल्लवी घरात नसताना प्रताप जाधव याने तिच्यावर जबरदस्ती केली. या प्रकारानंतर ती पोलिसांकडे जाण्याच्या तयारीत असताना आरोपी पती-पत्नीने पुन्हा पैशांसाठी दबाव टाकला. पैसे देण्यास नकार दिल्यानंतर पल्लवीने प्रतापला उचकावले. पल्लवी ही प्रताप याला ‘‘प्रताप हिची मस्ती जिरव’’ असे म्हणाली. तेव्हा पल्लवी घरात असताना प्रताप याने फिर्यादी हिच्यावर लैंगिक अत्याचार केला. त्यानंतर दोघांनी मिळून महिलेवर पुन्हा अत्याचार केल्याचे फिर्यादीत नमूद आहे.
आरोपींनी पीडितेचे कपडे बदलतानाचे फोटो व व्हिडिओ चित्रीत केल्याचा आरोप असून ते सोशल मीडियावर व्हायरल करण्याची धमकी देण्यात आली. याचबरोबर बारामतीतील एका उद्योजकाविरोधात खोटा गुन्हा दाखल करण्यासाठी महिलेवर दबाव टाकण्यात आला. तसे केल्यास २० ते २५ लाख रुपये आणि बारामतीतील एक फ्लॅट देण्याचे आमिष दाखवण्यात आल्याचेही तक्रारीत नमूद आहे. पिडितेने नकार दिल्यानंतर तिला जिवे मारण्याची धमकी देण्यात आल्याचा आरोप आहे.
प्रकरणाचे गांभीर्य लक्षात घेऊन भारती विद्यापीठ पोलिसांनी तात्काळ कारवाई करत प्रताप जाधव आणि पल्लवी जाधव यांना अटक केली. एका वकिलासह इतर पाच जणांविरुद्धही विविध कलमांनुसार गुन्हा दाखल करण्यात आला आहे. पोलीस उपनिरीक्षक निलेश मोकाशी पुढील तपास करत आहेत. या घटनेमुळे परिसरात खळबळ उडाली असून, आर्थिक व्यवहाराच्या निमित्ताने महिलांवर होणाऱ्या अत्याचारांच्या प्रकारांबाबत चिंता व्यक्त केली जात आहे.
