विक्रम वरे : महान्यूज लाईव्ह
बारामती : बारामती तालुक्यातील सोमेश्वर सहकारी साखर कारखान्याने राज्यात साखर कारखानदारीत एक नवा आदर्श निर्माण केला. बारामती व इंदापूर तालुक्यातील साखर कारखानदारीत पहिल्यांदाच मागास प्रवर्गातील संचालकाला कारखान्याचा पदाधिकारी होण्याची संधी निर्माण झाली. तालुक्यातील सोमेश्वर सहकारी साखर कारखान्याच्या उपाध्यक्षपदी मिलिंद कांबळे यांची बिनविरोध निवड करण्यात आली.
विशेष म्हणजे गेल्या तीन पिढ्यांपासून पवार कुटुंबांशी एकनिष्ठ असलेल्या कांबळे कुटुंबाला या पदासाठी सन्मानाने निवडण्यात आले यातून राष्ट्रवादी काँग्रेसने देखील एक मोठा संदेश तालुक्यात दिला आहे. गेल्या 70 वर्षात साखर कारखानदारीचा इतिहास लक्षात घेतला, तर डोक्यापेक्षा डोकी किती याला महत्त्व दिले जात होते. त्यामुळे वंचित घटकात फार तुरळक पदे मिळाली. मात्र या निमित्ताने यापुढील काळात साखर कारखानदारीसारख्या सहकारी चळवळीत देखील सामाजिक समरसता निर्माण होणार आहे
सोमेश्वर कारखान्याचा विचार करता पाच वर्षात पाच संचालकांना या पदावर काम करण्याची संधी मिळणार आहे. सुरुवातीला आनंदकुमार होळकर आणि त्यांनंतर कारखान्याच्या इतिहासात प्रथमच महिला संचालक प्रणिता खोमणे यांना उपाध्यक्षपदी काम करण्याची संधी मिळाली होती. तिसऱ्या वर्षात पुंरदरचे बाळासाहेब कामथे यांना उपाध्यक्षपदी काम करण्याची संधी मिळाली.
त्यांचा राजीनामा मंजूर झाल्याने सहकार निवडणूक प्राधिकरणाकडून निवडणूक कार्यक्रम आखण्यात आला होता. मिलिंद कांबळे यांची दोनच महिन्यापूर्वी संचालकपदी निवड झाली होती व आता उपाध्यक्षपदाची जबाबदारी मिळाली आहे. संचालकपदी निवड झाल्यानंतर प्रामाणिक कार्यकर्त्याला संधी मिळाल्यानंतर परिसरातून सर्वांनी मिलिंद कांबळे यांचे अभिनंदन करून सार्थ निवड झाल्याबद्दल समाधान व्यक्त केले होते. संचालकपदी निवड झाल्यानंतर मिलिंद कांबळे यांना अश्रूही अनावर झाले होते.
उपाध्यक्ष बाळासाहेब कामथे यांनी आपल्या पदाचा राजीनामा दिल्यानंतर रिक्तपदी ही निवड करण्यात आली. कारखान्याचे अध्यक्ष पुरुषोत्तम जगताप यांच्या अध्यक्षतेखाली आज ३ रोजी जिजाऊ सभागृहात झालेल्या संचालक मंडळाच्या मासिक सभेत हा निर्णय घेण्यात आला. उपमुख्यमंत्री अजित पवार यांच्या सुचनेनुसार मिलिंद कांबळे या नावाची घोषणा करून मासिक सभेत शिक्कामोर्तब करण्यात आले.
यावेळी माजी अध्यक्ष राजवर्धन शिंदे, संचालक संग्राम सोरटे, सुनील भगत, ऋषिकेश गायकवाड, शिवाजीराजे निंबाळकर, आनंदकुमार होळकर, विश्वास जगताप,प्रवीण कांबळे, प्रणिता खोमणे, कमल पवार, लक्ष्मण गोफणे, शैलेश रासकर, जितेंद्र निगडे, अनंत तांबे, तुषार माहुरकर, शांताराम कापरे, हरिभाऊ भोंडवे, किसन तांबे, कार्यकारी संचालक राजेंद्र यादव, कालिदास निकम यांच्यासह सर्व संचालक मंडळ उपस्थित होते. निवडणूक निर्णय अधिकारी म्हणून सहाय्यक निबंधक प्रमोद दुर्गुडे यांनी काम पाहिले.
