बारामती : महान्यूज लाईव्ह
जनसमान यात्रेची सुरुवात बारामतीत झाली होती मात्र त्यावेळी पावसाने या यात्रेवरती परिणाम केला होता सोमवारी मात्र दिवसभर बारामती शहरात जनसमान रॅलीचा रोडशो आणि पदयात्रा होणार आहे बारामतीतील तुळजाराम चतुचंद महाविद्यालयाच्या शेजारील मिशन हायस्कूलच्या ग्राउंडवर या यात्रेची सभा होणार आहे.
या यात्रेच्या निमित्ताने बारामती शहरात तयारी करण्यात आली असून, सकाळी दहा वाजता विमानतळ ते पेन्सिल चौक विद्यानगरी येथे उपमुख्यमंत्री अजित पवार, प्रदेशाध्यक्ष सुनील तटकरे व राष्ट्रवादी काँग्रेसचे राष्ट्रीय कार्याध्यक्ष प्रफुल्ल पटेल हे येणार आहेत. तेथूनच त्यांची मोटरसायकल पदयात्रा होणार आहे.
अंदाजे दोन हजार मोटरसायकल स्वार या पदयात्रेत सहभागी होणार असल्याची माहिती राष्ट्रवादी काँग्रेस अजित पवार यांच्या पक्षाच्या वतीने देण्यात आली असून भिगवण रस्त्यावरील पेन्सिल चौक येथून बारामतीतील जिल्हा व सत्र न्यायालयाच्या न्यायमंदिर चौक व तेथून माळावरची देवी, रिंग रोड ते इंदापूर रोड मोतीबाग येथून आमराई येथील डॉ. बाबासाहेब आंबेडकर पुतळा येथे आगमन होणार आहे.
या ठिकाणी डॉ. बाबासाहेब आंबेडकर यांच्या पुतळ्याला पुष्पहार अर्पण करून पुन्हा ही मोटरसायकल यात्रा इंदापूर बारामती रस्त्याने बसस्थानकाकडून काटे हॉस्पिटल, रिंग रोड मार्गे कारभारी सर्कल व तेथून कसब्यातील शिवाजी उद्यानात पोहोचणार आहे. कसबा येथील शिवाजी उद्यानात श्री छत्रपती शिवाजी महाराज यांच्या पुतळ्यास पुष्पहार अर्पण करून रोड शो रॅलीला सुरुवात होणार आहे.
या रोड शो मध्ये सनई चौघडा पथक, बँड पथक, लेझीम ढोल, गजीपथक सहभागी होणार असून कसबा ते कऱ्हा नदी पुलावरून गुणवडी चौक तेथून महावीर पथ, गांधीचौक मार्गे, सुभाष चौक, भिगवण चौक मार्गे नटराज नाट्यमंदिर या ठिकाणी या रोडशो ची समाप्ती होणार आहे. यानंतर मिशन कंपाउंड टीसी कॉलेज लगतच्या मैदानावर जनसन्मान यात्रेची मुख्य सभा होणार आहे.
