पुणे : महान्यूज लाईव्ह
गेल्या चार वर्षात भारतीय जनता पक्षाने अनेक पक्ष फोडले अनेक नेते फोडले. अनेक नेत्यांना कारवाईच्या धमक्या देत त्यांचे भाजप प्रवेश करून घेतले, आता मात्र विधानसभाच नव्हे लोकसभेतच भाजपची कोंडी होऊ लागली आहे. याचा फटका भाजपला बसू लागला असून, येत्या दोन दिवसात भाजपचा पश्चिम महाराष्ट्रातील मोठ्या राजकीय घराण्याचा नेता राष्ट्रवादी काँग्रेस शरदचंद्र पवार पक्षात प्रवेश करणार आहे.
14 एप्रिल रोजी अकलूजच्या विजयसिंह मोहिते पाटील क्रीडा संकुलमध्ये धैर्यशील मोहिते पाटील हे शरद पवारांच्या उपस्थितीत तुतारी हातात घेणार आहेत. 16 एप्रिल रोजी ते माढा लोकसभा मतदारसंघाचा अर्ज दाखल करतील. भाजपने पहिल्याच यादीत माढा लोकसभा मतदारसंघातून रणजीत सिंह नाईक निंबाळकर यांचे नाव जाहीर केले आणि तिथेच माढा लोकसभेतील वादळाला सुरुवात झाली.
भाजपचे संकट मोचक गिरीश महाजन तसेच उपमुख्यमंत्री देवेंद्र फडणवीस यांच्या शिष्टाईनंतरही हा राजकीय वाद मिटला नाही. उलट तो वाढतच गेला. भाजपात मोठा अंतर्गत कलह असल्याचे यातून समोर आले आणि ते 2019 च्या दरम्यान महाराष्ट्रातील राजकारणात बलाढ्य मानला गेलेल्या नेत्यांनाही आवरता येत नाही हे देखील सिद्ध झाले.
आता गेल्या काही दिवसांपासून अकलूजच्या शिवरत्न या बंगल्यावर सुरू असलेली वर्दळ आता विशिष्ट दिशेने जाणार असल्याचे संकेत देत असून मोहिते पाटील पुन्हा एकदा बंडाचा झेंडा उभा करत आहेत. सन 2019 नंतर पुन्हा पाच वर्षांनी मोहिते पाटील घराणे पक्षांतर करत आहे. सन 2019 मध्ये राष्ट्रवादीशी बंड करून मोहिते पाटलांनी भाजपचे कमळ हातात घेतले आणि 2024 मध्ये पुन्हा त्यांनी राष्ट्रवादी काँग्रेस शरदचंद्र पवारांकडे आपली दिशा वळवली आहे.
धैर्यशील मोहिते पाटील यांच्याप्रमाणेच फलटणचे रामराजे नाईक निंबाळकर यांचे कुटुंब देखील रणजीतसिंह नाईक निंबाळकर यांच्या उमेदवारीच्या विरोधात आहे. शरद पवारांशी यासंदर्भात गेले काही दिवस चर्चा सुरू होती. शरद पवारांनी या दोन्ही कुटुंबांना एकत्र बसून एक उमेदवार द्या अशी सूचना केली आणि त्यानुसार धैर्यशील मोहिते पाटील यांचे नाव चर्चेत आले. आता धैर्यशील मोहिते पाटील हे हातात तुतारी घेणार आहेत.
