दौंड पोलीस निरीक्षक चंद्रशेखर यादव यांची कामगिरी!
दौंड : महान्यूज लाईव्ह
लग्न समारंभात घुसून लोकांच्या गर्दीचा गैरफायदा फायदा घेऊन नवरीचे दागिने, खिशातील पैशांची पाकिटे व इतर मौल्यवान साहित्यांवर डल्ला मारणाऱ्या तीन परप्रांतीयांना दौंड पोलिसांनी जेरबंद केले असून त्यात एका महिला गुन्हेगाराचा समावेश आहे. तर यातील दोघे आरोपी पळून गेले अशी माहिती पोलीस निरीक्षक चंद्रशेखर यादव यांनी दिली.
याबाबत पोलिसांनी दिलेली सविस्तर माहिती अशी की, दौंड – काष्टी रोडलगत असलेल्या पवार पॅलेस येथे मंगळवारी ( दि २७) एक विवाहसोहळाचा कार्यक्रम सुरु असताना निलेश पवार (रा. सोनवडी ता.दौंड ) यांना काही संशयित हे गर्दीचा फायदा घेऊन चोरीच्या उद्देशाने फिरत असल्याबाबत लक्षात आले. त्यांनी तात्काळ दौंड पोलिसांना माहिती कळविली.
दौंड पोलिसांनी क्षणांचा विलंब न करता तत्काळ पवार पॅलेस मंगल कार्यालय गाठले आणि कार्यालयातील निलेश पवार आणि नागरिकांच्या मदतीने दोन व्यक्तींना आणि एका महिलेला शिताफीने ताब्यात घेतले. राज रामनारायण सिसोदिया (वय- २७), बलभीम माकड सिसोदिया (वय- १९), शब्बोबाई प्रतापसिंग सिसोदिया (वय- ५०) सर्व (रा. गुलखेड ता. राजगड मध्यप्रदेश) अशी यांची नावे आहेत.
पोलिसांनी दोघांची अंगझडती घेतली असता त्यांनी जबरदस्ती चोरी केलेले पाकीट त्यामध्ये ६ हजार ५०० रूपये हे राज रामनारायण सिसोदिया याच्याजवळ मिळून आले. पोलिसांनी सखोल चौकशी केली असता त्यांनी आमच्यासोबत राहुल रामनारायण सिसोदिया व दिनेशराजे सिसोदिया (रा.रायगड मध्यप्रदेश) हे देखील असल्याचे सांगितले.
या आरोपींवर गुन्हा दाखल करून त्यांना दौंड न्यायालयात हजर केले असता न्यायालयाने त्यांना दोन दिवसाची पोलीस कोठडी ठेवण्याचे आदेश दिले. दरम्यान, मध्यप्रदेशातून महाराष्ट्रात मंगल कार्यालयातील दागिने चोरी करण्यासाठी हे व्यक्ती येतात. या टोळीने पुणे जिल्ह्यात मोठ्या प्रमाणावर चोऱ्या केल्या असण्याची शक्यता पोलिसांनी वर्तवली आहे. दरम्यान याबाबत मंगल कार्यालयामध्ये संशयास्पद व्यक्ती दिसून आल्यास पोलिसांशी संपर्क साधावा, तसेच संबंधित लग्न समारंभातील लोकांनीही काळजी घेण्याचे आवाहन पोलीस निरीक्षक यादव यांनी केले आहे.
ही कारवाई पुणे ग्रामीणचे पोलीस अधीक्षक पंकज देशमुख, बारामती विभागाचे अप्पर पोलीस अधीक्षक संजय जाधव, दौंड उपविभागीय पोलीस अधिकारी स्वप्नील जाधव यांच्या मार्गदर्शनाखाली दौंड पोलीस ठाण्याचे पोलीस निरीक्षक चंद्रशेखर यादव, सहाय्यक पोलीस निरीक्षक अरविंद गटकुळ पोलीस अमलदार सुभाष राऊत, नितीन बोराडे, विजय पवार, विशाल जावळे, आदेश राऊत, अमोल देवकाते, सुरेश चौधरी, रवी काळे, अशोक जाधव आदींनी केली.
