पाटसला लवकरच नवीन स्वतंत्र पोलीस ठाणे होणार! राज्याचे गृहमंत्री देवेंद्र फडणवीस यांची पावसाळी अधिवेशनात घोषणा!
राजेंद्र झेंडे, महान्युज लाईव्ह
दौंड : दौंड तालुक्यातील यवत पोलिस ठाण्याचे विभाजन होऊन पाटस येथील पोलीस चौकीचे लवकरच नवे पोलीस स्टेशन मध्ये निर्मिती करण्यात येईल. अशी घोषणा राज्याचे उपमुख्यमंत्री आणि गृहमंत्री देवेंद्र फडणवीस यांनी आज पावसाळी अधिवेशनात केली. ही माहिती आमदार राहुल कुल यांनी दिली.
मागील अनेक वर्षापासून प्रलंबित असलेल्या पाटस पोलीस ठाण्याचा प्रस्ताव शासन दरबारी धुळखात पडला होता. पाटस पोलीस ठाणे होण्यासंदर्भात तब्बल चार वेळा गृह विभागाने राज्य शासनाकडे प्रस्ताव पाठवण्यात आला होता. मात्र पाटस पोलीस ठाण्याचा प्रस्तावानंतर पाठीमागून पुणे जिल्ह्यातील बारामती तालुक्यातील सुपा व माळेगाव तसेच इंदापूर तालुक्यातील भिगवण व नरसिंहपुर येथे पोलीस ठाण्यात मंजुरी मिळाली.
तेथे पोलीस ठाण्याचा कारभार सुरू झाला. मात्र राजकीय इच्छाशक्ती अभावी पाटस पोलीस ठाण्याचा प्रस्ताव शासन दरबारी प्रलंबित पडला गेला . मात्र राज्याचे उपमुख्यमंत्री आणि गृहमंत्री देवेंद्र फडणवीस यांनी आज गुरुवारी ( दिनांक २७) पावसाळी अधिवेशनात यवत पोलीस ठाण्याच्या अंतर्गत असलेल्या पाटस पोलीस चौकीचा नवीन पोलीस ठाण्याचा स्वतंत्र दर्जा देण्याची घोषणा केली.
त्यामुळे पुन्हा एकदा पाटस पोलीस ठाण्याचा विषय चर्चेत आला असून याचा मार्ग मोकळा झाला आहे. आज झालेल्या पावसाळी अधिवेशनातील सत्राबाबत माहिती देताना आमदार राहुल कुल म्हणाले की , दौंड तालुक्यात दौंड व यवत पोलीस ठाणे, उपविभागीय अधिकारी, एसआरपी गट क्रमांक पाच आणि सात व पोलीस प्रशिक्षण केंद्र या आस्थापना आहेत. त्यामधील पोलीस स्टेशन, त्यांच्या कर्मचाऱ्यांसाठी निवास व्यवस्था उपलब्ध करून द्यावी तसेच दौंड शहरात एक पोलीस चौकी व्हावी अशी मागणी केली हेाती.
याशिवाय दौंड तालुका ७० टक्के ‘पीएमआरडीए’मध्ये गेलेला आहे. तालुक्यात रेल्वे जंक्शन व रेल्वेलाईन, तीन महामार्ग आणि एक एमआयडीसी असूनही तालुक्यात केवळ दोनच पोलीस स्टेशन आहेत. त्यामुळे पाटसला नवीन पोलीस ठाणे सुरू करावे. त्याचा प्रस्तावही तयार केला होता, त्याची पूर्तता करण्यात यावी अशी मागणी कुल यांनी विधानसभेत केली होती.
त्यावर उत्तर देताना गृहमंत्री फडणवीस यांनी आमदार कुल यांची पाटस पोलीस ठाण्याच्या संदर्भात केलेली मागणी मंजूर करत असल्याची घोषणा केली. पोलीसांचा आकृतीबंध नसल्यामुळे ही मागणी एवढे दिवस मान्य होत नव्हती. पण आपण आता पोलीसांच्या नवीन आकृतीबंधाला मान्यता दिलेली आहे, त्यामुळे नव्या पोलीस ठाण्यासंदर्भातील प्रश्न मिटला आहे.
दौंड पोलीस ठाण्याच्या अंतर्गत एक पोलीस चौकी निर्माण करण्यासाठीही आपल्याला जागा उपलब्ध झालेली आहे, त्यामुळे दौंड पोलीस ठाण्याच्या अंतर्गत एक पोलीस चौकीही मंजूर करण्यात येईल, असेही फडणवीस यांनी स्पष्ट केले.
पोलीस इमारती आपल्याला सर्वांना एकाच वेळी देता येणार नाहीत. त्याची प्राधान्य यादी ठरविण्यात आली आहे. तेथील विभाग प्रमुखांशी चर्चा करून यादीतील कुठल्या इमारतीला प्राधान्य द्यायचे, याचा निर्णय घेण्यात येईल. टप्प्याटप्याने इतर सर्वच इमारतींचे काम करणार आहोत असेही गृहमंत्री फडणवीस यांनी सांगितले. तसेच यवत पोलीस ठाण्याच्या अंतर्गत असलेल्या पाटस पोलीस चौकीचे विभाजन करून स्वतंत्र नवीन पोलीस ठाणे मंजूर केले असून लवकरच सुरू करण्यात येईल अशी घोषणा राज्याचे उपमुख्यमंत्री तथा गृहमंत्री देवेंद्र फडणवीस यांनी केली आहे . अशी माहिती आमदार कुल यांनी दिली.
