खासदार संजय राऊत यांची माहिती!
राजेंद्र झेंडे, महान्युज लाईव्ह
दौंड भाजपचे आमदार राहुल कुल यांच्या ताब्यातील भीमा पाटसची चौकशी केल्याशिवाय शांत बसणार नाही, पुढील पंधरा दिवसात भीमा पाटस संदर्भात पाटसला सभा होणार आहे, या सभेचं निमंत्रण आले आहे. ही सभा होणार आणि मी या सभेला जाणार आहे. शेतकऱ्यांना मार्गदर्शन करणार आहे. साडेपाचशे कोटींचा भ्रष्टाचार बाहेर काढणार आहे. अशी माहिती शिवसेना ठाकरे गटाचे फायर ब्रँड, खासदार संजय राऊत यांनी बारामतीत झालेला पत्रकार परिषदेत दिली.
भाजप आमदार राहुल कुल यांच्या ताब्यातील भीमा सहकारी कारखान्यात झालेल्या कथित साडेपाचशे कोटींच्या भ्रष्टाचाराबाबत मी मागील काही दिवसांपासून सातत्याने आवाज उठवत आहे, या संदर्भात काल-परवा राज्याचे उपमुख्यमंत्री व गृहराज्यमंत्री यांना पत्र पाठवले आहे.
आमच्यावर नसलेल्या गोष्टी उभ्या करून सीबीआय व ईडी मार्फत चौकशी करून कारवाई केली जाते, तशी कारवाई ते स्वतःच्या पक्षातील भ्रष्ट कारभाराची का करत नाहीत? असा सवाल खासदार राऊत यांनी उपस्थित करत भीमा पाटस सहकारी साखर कारखान्यात शेतकऱ्यांची प्रचंड लूट व फसवणूक झाली आहे. यासंबंधीची माहिती शेतकऱ्यांनी व सभासदांनी मला पुराव्यासहित दिली आहे असे सांगितले.
अंत्यत घाणेरड्या प्रकारचा साडेपाचशे कोटींचा भ्रष्टाचार झाल्याचे स्पष्ट आहे. या संदर्भात उद्या सीबीआय व ईडी च्या कार्यालयात पत्रव्यवहारही करणार आहे. ज्या पद्धतीने सीबीआय व ईडी आमच्या मागे लागते, आमची चौकशी करते तर मग एवढी मोठी शेतकऱ्यांची फसवणूक झाली आहे याचीही चौकशी करावी.
कारखान्यात भ्रष्टाचार झाला नाही असे आमदार राहुल कुल व त्यांच्या समर्थकांचे म्हणणे आहे ना? तर मग चौकशी होऊ द्या. चौकशीला का घाबरताय? शेतकरी व सभासदांनी मला भीमा पाटसच्या च्या भ्रष्टाचाराच्या प्रश्नांवर सभेसाठी आमंत्रित करण्यात आले आहे. या सभेसाठी मी आवर्जून जाणार आहे आणि शेतकऱ्यांनी व सभासदांना मी कारखान्यात कशा पद्धतीने भ्रष्टाचार झाला आहे या संदर्भात मार्गदर्शनही करणार आहे. अशी माहिती यावेळी पत्रकार परिषदेत खासदार राऊत यांनी दिली.
ते पुढे म्हणाले की ,शिवसेनेतून ११ आमदार व ९ खासदार फुटुन त्यांच्या पक्षात गेले आहेत. त्यांची सीबीआय व ईडीची खटले थांबवले आहेत.भाजप सरकार हे भ्रष्टाचार करणाऱ्यांना पाठीशी घालत आहे. असा आरोपही खासदार राऊत यांनी यावेळी केला. याप्रसंगी एग्रीकल्चरल डेव्हलपमेंट ट्रस्टचे प्रमुख राजेंद्र पवार, कर्जतचे आमदार रोहित पवार उपस्थित होते.
