भोर : महान्यूज लाईव्ह
माणिक पवार
छत्रपती शिवाजी महाराज यांच्या विश्ववंदनीय कार्याच्या स्मृतींना उजाळा देऊन प्रखर राष्ट्रीय बाण्याचा जागर व्हावा यासाठी वेल्हे तालुक्याचे नामकरण राजगड करण्यासाठी जिल्हा परिषदेमध्ये एकमुखाने प्रस्ताव मंजूर करण्यात आल्याची माहिती पुणे जिल्हा परिषदेचे उपाध्यक्ष रणजित शिवतरे यांनी दिली. वेल्हा ऐवजी राजगड तालुका नामकरण होणार असल्याने शिवप्रेमी मधून आनंद व्यक्त होत आहे.
वेल्हा तालुक्याला नवीन ओळख मिळावी यासाठी राजगड तालुका करण्यासाठी सर्व घटकातून मागणी होत असल्याच्या पार्श्वभूमीवर जिल्हा परिषदेच्या सर्वसाधारण सभामध्ये उपाध्यक्ष रणजित शिवतरे यांनी ठराव मांडला होता. याला सर्व सदस्यांनी एकमुखाने पाठिंबा दिला. यामुळे तालुक्याला वेल्हा ऐवजी राजगड म्हणून नामकरण करण्यात आल्याने वेल्हा, भोर, मुळशी, हवेली आदी भागातील शिवप्रेमीमधून आनंद व्यक्त होत आहे. इतिहास संशोधक, क्रीडा, सहकार तसेच सर्वपक्षीय राजकीय नेत्यांमधून जिल्हा परिषदेच्या या निर्णयाचे स्वागत होत आहे. राजगड हे ऐतिहासिक नाव वेल्हा तालुक्याला नाव मिळणार असल्याने पर्यटन वाढण्याची शक्यता आहे. यामुळे स्थानिक बेरोजगारांना रोजगार मिळण्याची शक्यता निर्माण झाली आहे.
