पुणे : महान्यूज लाईव्ह
मांजरी येथील स्मशानभूमीजवळ काळूबाई मंदिराच्या बाजूला आज एकाचा खून झाला. विकास लक्ष्मण सोनवणे (रा. मांजरी खुर्द, पुणे) असे या खून झालेल्या व्यक्तीचे नाव असून त्याच्या खुन्यांना लोणीकाळभोर पोलिस व युनिट क्रमांक ६ च्या पथकाने १२ तासाच्या आत पकडले.
आज सकाळी लोणीकाळभोर पोलिस ठाण्याचे पोलिस निरीक्षक गणेश माने यांच्यासह त्यांचे पथक पेट्रोलिंग करीत असताना मांजरी स्मशानभूमीनजिक खून झाल्याची माहिती मिळाल्याने माने यांचे पथक व गुन्हे शाखा युनिट -६ च्या पथकाने घटनास्थळी भेट दिली.
त्या ठिकाणी विकास सोनवणे याचा खून करून हेमंत मोरे व त्याचे साथीदार हे केसनंद मार्गाने निघालेले असल्याची माहिती पोलिस शिपाई ऋषीकेश ताकवणे, ऋषीकेश व्यवहारे यांना मिळाली. त्यावरून गणेश माने यांना ही माहिती त्यांनी कळवली.
माने यांनी ताकवणे, व्यवहारे व सचिन पवार यांचे एक पथक आणि नितीन मुंडे, कानिफनाथ कारखेले, नितीन शिंदे यांचे एक पथक करून लोणीकंद व केसनंद गावाच्या दिशेने पाठवले. मिळालेल्या माहितीनुसार या पथकांनी ज्या रस्त्याने गुन्हेगार गेले आहेत, त्या रस्त्याने पाठलाग सुरू केला. ह्युंडाई कारने आरोपी निघाले होते, त्यांना लोणीकंद हद्दीतील खंडोबाचा माळ येथे गाठले. तेव्हा कारमधून हे आरोपी पळत होते.
ताकवणे, व्यवहारे, पवार यांच्या पथकाने शुभम अशोक गायकवाड (वय २३ वर्षे. रा. शिवशंभोनगर, संतोषी माता मंदिराजवळ मांजरी) व अभिजीत उर्फ नाना सुखराज महाले (वय २३ वर्षे) यांना ह्युंडाई वेरना कार (क्रमांक एमएच१२ एच झेड १३१४) या कारसह ताब्यात घेतले.
तर मुंढे, कारखेले व शिंदे यांच्या पथकाने पुढे येऊन हेमंत किसन मोरे (वय ३१ वर्षे), गोविंद बाबासाहेब बनसोडे (वय २६ वर्षे, दोघेही रा. शिवशंभोनगर, मांजरी) यांना ताब्यात घेतले. त्यांच्याकडील तपासातून १ ऑगस्ट रोजी रात्री सव्वा अकरा वाजता त्या चौघांनी मिळून विकासचा खून केल्याचे पुढे आले.
