औदुंबर क्षिरसागर :महान्यूज लाईव्ह
करमाळा शहरात मानसी हॉटेलवर शहर पोलीसांनी धाड टाकून हाँटेलमध्ये सुरू असलेल्या वेश्या व्यवसायाचा पर्दाफाश केला आहे, याप्रकरणी पोलिसांनी हॉटेल चालकासह दोन ग्राहक व तीन महिलांना ताब्यात घेतले आहे.
संजय सरोदे (हाँटेल मालक), संभाजी रोटे (रा.खादगाव ता.कर्जत) व शंकर खटके (रा.पोथरे ता. कर्जत ) या तिघांना पोलिसांनी अटक केली आहे. शुक्रवारी (दि.३ ) सायंकाळी पोलिसांनी ही कारवाई केली .
याबाबत पोलिसांनी दिलेली माहिती अशी की, करमाळा शहरात कर्जत रस्त्यावर मानसी हॉटेलवर वेश्याव्यवसाय चालत असल्याची माहिती पोलिसांना मिळाली होती. त्यानुसार करमाळा उपविभागीय पोलीस अधिकारी यांच्या नेतृत्वाखाली पोलीस निरीक्षक सूर्यकांत कोकणे, सहायक पोलिस निरीक्षक सचिन जगताप, हवालदार देवकर, महिला पोलीस कॉन्स्टेबल शितल पवार, पोलीस कॉन्स्टेबल गवळी, जगताप आदींच्या पथकाने या हाँटेलवर धाड टाकली.
यावेळी बोगस ग्राहक म्हणून दोघांना हॉटेलमध्ये पाठवले होते. हॉटेल मालक संजय सरोदे हा एक हजार रुपये घेऊन महिला पुरवण्याचे काम करत असल्याचे यावेळी उघडकीस आले. याप्रकरणी सहायक पोलिस निरीक्षक सचिन जगताप यांनी फिर्याद दिल्याने हॉटेल मालकासह दोन ग्राहकांच्या विरोधात गुन्हा दाखल करण्यात आला आहे.
