संजय गांधी योजनेत इंदापूरचे नाव राज्यात टाॅप टेन मध्ये आणणार ‌‌- सागर मिसाळ

इंदापूर तहसील कार्यालयात समितीची पहिली आढावा बैठक

सुरेश मिसाळ – महान्यूज लाईव्ह

इंदापूर : संजय गांधी निराधार अनुदान योजनेचे आदर्श काम करुन इंदापूरचे नाव महाराष्ट्रात टाॅप टेन मध्ये आणण्यासाठी आपला प्रयत्न राहणार आहे. त्याअनुषंगाने तालुका समितीच्या सदस्यांना विश्वासात घेऊन त्यांच्या सहकार्याने उत्कृष्ट कामगिरी करत राज्यात इंदापूर पॅटर्न चा आदर्श घेतील असे काम केले जाईल,असा विश्वास संजय गांधी निराधार अनुदान योजनेचे अध्यक्ष सागर मिसाळ यांनी व्यक्त केला.

संजय गांधी निराधार अनुदान योजना समितीची स्थापना झाल्यानंतर मंगळवारी (दि.29) रोजी इंदापूर तहसील कार्यालयात समितीची पहिली आढावा बैठक पार पडली. यावेळी नवनिर्वाचित समितीचे अध्यक्ष व सर्व सदस्यांचा सत्कार तहसीलदार अनिल ठोंबरे यांनी केला.
या पहिल्याच बैठकीत 48 लाभार्थ्यांच्या अर्जांना मंजुरी देण्यात आली. तर 13 अर्ज अपात्र ठरवण्यात आले.

शासकीय योजनांच्या लाभासाठी एकूण 61 अर्ज प्राप्त आले होते. त्यापैकी 48 अर्ज मंजूर करण्यात आले.यात संजय गांधी निराधार अनुदान योजनेसाठी 7 अर्ज, श्रावणबाळ बाळ सेवा राज्य निवृत्ती वेतन यासाठी 23, इंदिरा गांधी राष्ट्रीय वृद्धापकाळ निवृत्ती वेतन योजना यासाठी 17 व इंदिरा गांधी राष्ट्रीय विधवा निवृत्ती वेतन योजना यासाठी एक अर्ज मंजूर करण्यात आला. तर 13 अर्ज योजनेच्या निकषात न बसल्याने नामंजूर करण्यात आले.

नामंजूर करण्यात आलेल्या अर्ज धारकांना आवश्यक निकषांसह ते पुन्हा सादर करण्यास सांगितले जाईल असे तहसीलदार तथा संजय गांधी निराधार योजना शासकीय समितीचे सचिव अनिल ठोंबरे यांनी बैठकीत सांगितले.

सागर मिसाळ म्हणाले की, या विविध योजनांचा लाभ घेण्यासाठी वयाच्या दाखल्याच्या पुराव्यासंदर्भात अडचणी निर्माण होत आहेत, यासाठी इंदापूर उपजिल्हा रुग्णालय किंवा ग्रामीण रुग्णालय निमगाव केतकी या ठिकाणचा दाखला ग्राह्य धरला जातो. मात्र यामध्ये नागरिकांना प्रचंड त्रास होत असून इंदापूर तालुक्यात कार्यरत असणारे प्राथमिक आरोग्य केंद्रातील शासकीय डॉक्टर यांच्या सहीने देण्यात येणारा वयाचा पुराव्याचा दाखला या योजनेसाठी ग्राह्य धरण्यात यावा. यासाठी तहसीलदारांनी योग्य तो निर्णय करावा.

या बैठकीस तहसलीदार अनिल ठोंबरे यांसह समितीचे अध्यक्ष व सर्व सदस्य आणि समता सैनिक दलाचे पुणे जिल्हाध्यक्ष अशोक पोळ, प्रहार अपंग संघटनेचे पुणे जिल्हा उपाध्यक्ष बाबासाहेब पाडुळे, तालुकाध्यक्ष अनंतराव गायकवाड आदी उपस्थित होते.