युवराज जाधव : महान्यूज लाईव्ह
सांगली – ही कहाणी आहे मिरजच्या नातीची…अन सातारा जिल्ह्यातील फलटणच्या आजोबांची…! कोविडने घराघरात अनेक समस्या आणून ठेवल्या.. आणि अनेकांच्या घरातील ज्योती काळाच्या आधीच विझवल्या…. त्यातही आयुष्याच्या संध्याकाळी कोरोना झालेल्यांना तर हा काळ जणू जिवघेणाच ठरला… मात्र यातून अनेकांनी कोरोनाला मात दिली.. फलटणमधील आजोबाही असेच कोरोनाशी झुंजता झुंजता थकू लागले.. तेव्हा मिरजच्या सरकारी दवाखान्यात प्रयोगशाळा परिचर असलेली नात त्यांच्यासह कुटुंबियांसाठी आशेचा किरण ठरली.
स्नेहा वेदपाठक यांच्या आजोबांचे वय ७७ वर्षे..! त्यांना अचानक अशक्तपणा वाटू लागल्याने नेहमीच्या डॉक्टरांकडे नेले. तेथे कोरोनाची चाचणी करण्याचा सल्ला दिला. चाचणी केली, तर अहवाल पॉझिटिव्ह आला. उपचार सुरू झाले. आजोबांना मधुमेह होता. त्यामुळे काळजी विशेषत्वाने घ्यावी लागणार होती. अशातच एका दवाखान्यात चुकीचे सलाईन लावल्याने त्यांना त्रास सुरू झाला. त्यांची रक्तातील साखर वाढली. मात्र या प्रकारात त्यांची ऑक्सिजनची मात्रा मात्र झपाट्याने खालावली. त्यातच एचआरसीटी स्कोअर तपासल्यानंतर तो १७ आल्याने सर्वांच्याच पायाखालची वाळू सरकली.
६८ टक्के फुफ्फुसाला संसर्ग झाल्याने व्हेंटीलेटरची गरज भासणार म्हणून कोठे उपचारासाठी बेडही उपलब्ध होईनात. मग स्नेहा यांनी त्या काम करीत असलेल्या मिरज सिव्हील हॉस्पिटलमध्ये बेडची चौकशी केली. बेड शिल्लक नव्हता. मात्र काही काळानंतर एक रुग्ण दगावल्याने बेड उपलब्ध होईल असे डॉक्टरांनी सांगताच आजोबांना तिकडे हलवले. मिरजला पोचेपर्यंत रात्रीचे दिड वाजले होते आणि तेव्हा आजोबांची ऑक्सिजनची मात्रा ७५ पर्यंत घसरली होती. नातीने जबाबदारीने आजोबांना येथे आणले आणि आता त्यांची प्रकृती अधिक गंभीर बनत गेली तर काय करायचे हा प्रश्न पुढे होता. . स्वतः कर्मचारी असल्याने थेट अतिदक्षता विभागापर्यंत जाण्याची परवानगी होती. तेथील आरोग्य कर्मचारी व डॉक्टरांनी धीर दिला आणि उपचाराला सुरवात झाली.. डॉ. हर्षवर्धन, डॉ. ओजस, डॉ. प्रसन्न यांनी तत्परतेने उपचार सुरू केले. उपचारास प्रतिसाद मिळू लागला. तीन दिवसांनंतर कोरोना निगेटिव्हचा अहवाल आला. मात्र ऑक्सिजनची मात्रा वाढत नव्हती..
रेमेडीसीव्हीर देण्याची गरज भासणार असल्याची माहिती देण्यात आल्यानंतर आजोबांचे काय होणार म्हणून रडत बसलेल्या स्नेहाला डॉक्टरांनी धीर दिला. रेमीडीसीवीर हा पर्याय आहे, मात्र त्यानंतर त्यांना उदभवणाऱ्या समस्यांचे काय असा प्रश्न तिच्यापुढे होता. त्यावरून तेथील डॉक्टरांनी स्नेहा यांना फुफ्फुस तज्ज्ञ डॉ. वाघ यांचा संपर्क क्रमांक दिला. मिरजच्याच सिव्हील हॉस्पिटलमधले प्रसिध्द डॉक्टर असलेल्या वाघ यांनी स्नेहा यांच्या विनंतीला लागलीच प्रतिसाद देत आजोबांची तपासणी केली व न्युमोनिया असल्याने त्या दृष्टीने तातडीेने उपचार करू असा सल्ला दिला आणि त्यानुसार उपचाराला सुरवात झाली. तीन दिवसांनंतर आजोबा या परिस्थितीतून बाहेर आले.. त्यांची ऑक्सिजनची मात्राही वाढली. फलटणला आता त्यांना अगदी ठणठणीत बरे करून नेता येणार असल्याने स्नेहा यांना दिलासा मिळाला… आणि नात आणि आजोबा हसायला लागले…!
