विशाल कदम : महान्यूज लाईव्ह
ऊरुळी कांचन : राज्यसह देशभरात कोरोना विषाणूचा प्रादुर्भाव प्रचंड वाढला असून, या परिस्थितीत रुग्णांना रक्ताची गरज आहे. त्यांना रक्त उपलब्ध व्हावे. यासाठी राज्य व केंद्र सरकारकडून रक्तदान करण्याचे अवाहन करण्यात आले होते. या अवाहनाला ऊरुळी कांचन ग्रामस्वच्छता अभियान ग्रुपने चांगला प्रतिसाद दिला आहे. तसेच हा ग्रुप नेहमी सामाजिक उपक्रमांमध्ये अग्रेसर असतो. या ग्रुपचे कार्य हे कौतुकास्पद आहे. असे मत थेऊर (ता. हवेली) येथील वाघ क्लिनिकचे प्रमुख डॉ. मोहन वाघ यांनी मांडले.
ऊरुळी कांचन (ता. हवेली) येथे ड्रीम्स युवा सोशल फाऊंडेशन संचलित ऊरुळी कांचन ग्रामस्वच्छता अभियान ग्रुप व आधार ब्लड सेंटर धनकवडी यांच्या संयुक्त विद्यमाने रक्तदान आणि प्लाझ्मादान शिबिराचे गुरुवारी (ता. १३) आयोजन करण्यात आले होते. यावेळी डॉ. वाघ यांनी वरील विधान मांडले. यावेळी महात्मा गांधी सर्वोदय संघाचे उपाध्यक्ष के. डी. कांचन, उरळीकांचनचे सरपंच संतोष उर्फ पप्पू कांचन, उरुळी कांचन पोलीस दूर क्षेत्राचे सहाय्यक पोलीस निरीक्षक दादाराजे पवार उपस्थित होते.
याबाबत अधिक माहिती देताना डॉ. वाघ म्हणाले की, कोरोनाचा प्रादुर्भाव टाळण्यासाठी नागरिकांमध्ये जनजागृती करणे अत्यंत महत्वाचे आहे. कोरोना रुग्णावर आधुनिक पद्धतीने उपचारपद्धतीचा त्वरित अवलंब केला पाहिजे. कोरोनाचा प्रसार रोखण्यासाठी नागरिकांनी रोग होण्याआगोदरच योग्य काळजी घेतली पाहिजे. मास्क, सॅनिटायझर, सोशल डिस्टंसिंग आणि स्वच्छता या नियमांचे पालन केल्यास आपल्याला कोरोनाला कसल्याही प्रकारे घाबरण्याची गरज नाही. कोरोनाचा प्रसार हा मानवनिर्मित आहे. आणि तो टाळला जाऊ शकतो.
या शिबिरात २२८ रक्तदात्यांनी सहभाग नोंदवला. यात २१८ पुरुष व १० महिलांचा समावेश होता. तर, १८ नागरिकांचे अँटिबॉडीज तपासणीसाठी रक्ताचे नमुने देण्यात आले. सहभागी प्रत्येक रक्तदात्यास झाड आणि प्रशस्तिपत्रक देण्यात आले. तर अजिंक्य चॅरिटेबल फाउंडेशन च्या वतीने प्रत्येक रक्तदात्यास वाफेचे मशीन भेट देण्यात आले.
दरम्यान, रक्तदान करण्यासाठी आलेल्या तरुणांच्या आरोग्याची विशेष काळजी शिबिरात घेण्यात आली. शिबिरात वारंवार सॅनिटायझरचा वापर करून उपस्थितांचे हात निर्जंतुकीकरण केले जात होते. ऊरुळी कांचन ग्रामस्थांनी रक्तदान शिबिरास उस्फूर्त प्रतिसाद दिला.
यावेळी पुणे जिल्हा नियोजन समितीचे संतोष कांचन, जिल्हा परिषदेच्या सदस्या किर्ती कांचन, पंचायत समितीच्या सदस्या हेमलाता बडेकर, उपसरपंच संचिता कांचन, अजिंक्य कांचन, अमित कांचन, मिलिंद जगताप, शैलेश गायकवाड, आधार ब्लड सेंटर धनकवडीच्या डॉ. अलका शिंदे, व्यस्थापक सिद्राय हेगले, परिचारिका आणि ग्रामस्वच्छता अभियान ग्रुपचे पदाधिकारी मोठ्या संख्येने उपस्थित होते.
