दौंड : महान्यूज लाईव्ह
दौंड तालुक्यातील कडेठाण येथील शेतजमीनीत सुरू असलेल्या बेकायदा वाळू उपसावर आज महसूल विभाग आणि पाटस पोलिसांनी छापा टाकला. एक जेसीबी मशीन आणि एक ट्रॅक्टर या पथकाने ताब्यात घेतला, दरम्यान संबंधित वाळू उपसा करणारे कारवाईसाठी पोलीस आल्याची चाहूल लागताच पसार झाले.
ही माहिती गावकामगार तलाठी बी. एस.जाधव यांनी दिली. कडेठाण येथील शेतजमीनीत स्थानिक वाळूमाफियांकडून खुलेआम जेसीबी मशीनच्या सहाय्याने बेकायदा वाळू उपसा सुरू असलेल्याची माहिती महसूल विभागाला मिळाली.
त्यानुसार दौंड तहसीलदार संजय पाटील,यवत पोलीस ठाण्याचे पोलीस निरीक्षक भाऊसाहेब पाटील यांच्या मार्गदर्शनाखाली तलाठी बी. एस. जाधव, तलाठी सचिन जगताप, पाटस पोलिस चौकीचे सहाय्यक फौजदार सागर चव्हाण, पोलीस नाईक भालेराव कोतवाल, चंद्रकांत पारखे, पोपट खोमणे आदींच्या पथकाने मंगळवारी ( दि.११) सायंकाळी कडेठाण येथील माहिती मिळाल्या ठिकाणी सुरू असलेल्या बेकायदा वाळू उपसावर धाड टाकली.
यावेळी शेतजमीनीत काहीजण एक जेसीबी व एक ट्रॅक्टरच्या सहाय्याने वाळू उपसा करीत असल्याचे निदर्शनास आले. कारवाईसाठी पथक आल्याचे पाहून संबंधित वाळू चोरांनी तेथून पळ काढला. या पथकाने वाळू उपसा करणारी वाहने ताब्यात घेतली. याचा तलाठ्यांनी पंचनामा केला.
दरम्यान, वाळू उपसा करणारी दोन्ही वाहनचालक फरार झाले असून, त्यांचा शोध घेऊन कारवाई करण्यात येणार आहे. तसेच सदर शेतजमिनीचा पंचनामा करून महसूलचा बोजा शेतजमीन वर टाकण्यासाठी तहसीलदार यांच्याकडे अहवाल सादर करण्यात येणार आहे अशी माहिती तलाठी जाधव यांनी दिली.
