शिक्रापूर : येथील भारतीय स्टेट बँकेसमोर (SBI) उभ्या असलेल्या क्रेटा कारची काच फोडून १० लाख रुपयांची रोकड लंपास करणाऱ्या आंतरराज्यीय टोळीचा शिक्रापूर पोलिसांनी पर्दाफाश केला आहे. सीसीटीव्ही फुटेज आणि तांत्रिक तपासाच्या आधारे पोलिसांनी थेट आंध्र प्रदेशातील नेल्लोर जिल्ह्यातील बिटरगुंटा येथे धडक कारवाई करत संशयिताच्या घरातून २ लाख ९० हजार रुपयांची रोकड जप्त केली आहे.
कारची काच फोडून पळवले होते १० लाख
मिळालेल्या माहितीनुसार, अतुल सुभाष जेधे (वय ४०, रा. जेधेवस्ती, तळेगाव ढमढेरे, ता. शिरूर) यांनी या प्रकरणी फिर्याद दिली होती. ८ सप्टेंबर रोजी दुपारी सव्वा एक वाजण्याच्या सुमारास जेधे यांनी त्यांची क्रेटा कार शिक्रापूर येथील एसबीआय बँकेसमोर पार्क केली होती. काही वेळातच अज्ञात चोरट्यांनी कारची काच फोडून आतील तब्बल १० लाख रुपयांची रोकड लंपास केली होती. याप्रकरणी शिक्रापूर पोलीस ठाण्यात भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला होता.
सीसीटीव्ही फुटेज आणि खबऱ्यांचे जाळे
गुन्ह्याचे गांभीर्य ओळखून पोलिसांनी घटनास्थळासह परिसरातील सीसीटीव्ही कॅमेऱ्यांचे फुटेज बारकाईने तपासले. त्यावरून संशयितांचा माग काढत असताना गुप्त बातमीदारांकडून आरोपी आंध्र प्रदेशातील असल्याची माहिती समोर आली. त्यानुसार तपासासाठी शिक्रापूर पोलिसांचे एक पथक दोन वेळा आंध्र प्रदेशातील नेल्लोर जिल्ह्यातील बिटरगुंटा येथे रवाना झाले.
घरातून २ लाख ९० हजार जप्त
स्थानिक पोलिसांच्या मदतीने कप्पराल टिप्पा, बोगल मंडल (बिटरगुंटा) येथे शोधमोहीम राबवण्यात आली. या तपासात रमेश बाबू गोडेट्टी (रा. कप्पराल टिप्पा, ता. बिटरगुंटा, जि. नेल्लोर) याच्या हालचाली संशयास्पद आढळल्याने पोलिसांनी त्याच्या घरावर छापा टाकला. झडतीदरम्यान चोरीच्या रकमेपैकी २ लाख ९० हजार रुपयांची रोकड हस्तगत करण्यात आली.
ही कारवाई पुणे ग्रामीणचे पोलीस अधीक्षक संदिपसिंह गिल, अपर पोलीस अधीक्षक शुभम कुमार, शिरूर विभागाचे उपविभागीय पोलीस अधिकारी रविंद्र भोसले यांच्या मार्गदर्शनाखाली शिक्रापूर पोलीस ठाण्याचे पोलीस निरीक्षक चंद्रशेखर यादव यांच्या नेतृत्वाखालील पथकाने केली. या पथकात पोलीस उपनिरीक्षक उमाकांत कुंजीर, जिनेस कोळी, तुषार भोर, अंकुश कारंडे तसेच पोलीस हवालदार अमोल दांडगे, रोहिदास पारखे, शिवाजी चितारे, विश्वंभर वाघमारे, अमोल नलगे, पोलीस कॉन्स्टेबल नारायण वाळके, राम जाधव, मच्छींद्र निचीत, नागेश वाघमारे आणि भारत भोसले यांचा समावेश होता. या गुन्ह्याचा पुढील तपास पोलीस उपनिरीक्षक उमाकांत कुंजीर आणि पोलीस कॉन्स्टेबल भारत भोसले करत आहेत.
