इंदापूर : महान्यूज लाईव्ह
संत तुकाराम महाराज राष्ट्रीय महामार्गाचे इंदापूर तालुक्यातील भवानीनगर, सणसर येथील भूसंपादन रखडले आहे. या रस्त्याचे बाह्यवळण रद्द करण्याची आक्रमक मागणी असल्याने हे भूसंपादन रखडले आहे, आता यावर तोडगा काढण्यासाठी तब्बल पाच पर्यायी मार्ग सार्वजनिक बांधकाम विभागाने सुचवले आहेत, त्यामुळे नेमका कोठून आता मार्ग होणार याची उत्सुकता आहे.
सार्वजनिक बांधकाम विभागाच्या मुख्य अभियंत्यांनी कालच या रस्त्याची पाहणी करीत कोणता रस्ता योग्य आहे याची चाचपणी केली. बाह्यवळण मार्गाद्वारे रस्ता केल्यास छत्रपती कारखान्याच्या सहवीजनिर्मिती प्रकल्पाला धोका पोचू शकतो, तसेच हा रस्ता भविष्यात धोकादायक बनू शकतो हे अधिकाऱ्यांच्या लक्षात आल्यानंतर तसेच येथील विरोधाची भावना लक्षात घेतल्यानंतर कमीत कमी नुकसान होणाऱ्या सरकारी पोकळीस्त जागेतून हा रस्ता काढण्याची तसेच उदमाईवाडी अथवा काझड बाजूच्या दोन पर्यायाची मार्गाची देखील चाचपणी करण्यात आली आहे.
दरम्यान छत्रपती कारखान्याच्या ऊस वाहतूकीची व्यवस्था निर्धोक होण्यासाठी ज्या मोऱ्या काढायच्या आहेत, त्या मोऱ्यांची स्थिती कोठे असणार याचीही चाचपणी केली.
सार्वजनिक बांधकाम विभागाच्या मुख्य अभियंत्यांनी कालच या र रस्त्याची पाहणी केली छत्रपती कारखान्याचे अध्यक्ष प्रशांत काटे, माजी अध्यक्ष पृथ्वीराज जाचक, संचालक रणजीत निंबाळकर, सणसरचे माजी उपसरपंच अभय सिंह निंबाळकर, जाचकवस्तीचे माजी उपसरपंच विक्रमसिंह निंबाळकर, अशोक काळे यांच्यासह कारखान्याचे विविध विभागांचे प्रशासकीय अधिकारी यावेळी उपस्थित होते.
राज्यातील १९४ कारखान्यांमध्ये केवळ राहूरी व छत्रपती हे दोन कारखाने रस्त्याला खेटून आहेत, रस्त्याच्या दोन्ही बाजूला याची व्यवस्था असते, त्यामुळे पुलाच्या बांधकामानंतरही कारखान्याचे अस्तित्व व्यवस्थित राहील अशा दृष्टीने नियोजन करण्याच्या सूचना जाचक यांनी यावेळी दिल्या.
