नवी दिल्ली / बारामती : उत्कृष्ट कामकाज आणि पारदर्शक कारभाराची अखंड परंपरा जपणाऱ्या श्री सोमेश्वर सहकारी साखर कारखान्याने पुन्हा एकदा देशाच्या पटलावर आपल्या कर्तृत्वाचा ठसा उमटवला आहे. नवी दिल्ली येथील ‘राष्ट्रीय सहकारी साखर कारखाना संघ लि.’ यांच्या वतीने सन २०२४-२०२५ या वर्षासाठीचा देशभरातील ‘तांत्रिक कार्यक्षमता’ (Technical Efficiency) या श्रेणीतील तृतीय क्रमांकाचा राष्ट्रीय पुरस्कार सोमेश्वर कारखान्याला प्रदान करण्यात आला. गतवर्षी सर्वोत्कृष्ट साखर कारखान्याचा देशपातळीवरील पुरस्कार पटकावल्यानंतर सलग दुसऱ्या वर्षी सोमेश्वरने राष्ट्रीय पातळीवर मान मिळवून यशाची परंपरा कायम राखली आहे.
नवी दिल्लीतील डॉ. आंबेडकर इंटरनॅशनल सेंटर येथे २२ सप्टेंबर २०२६ रोजी आयोजित भव्य राष्ट्रीय समारंभात हा गौरव करण्यात आला. केंद्रीय दळणवळण व वाहतूक मंत्री नितीन गडकरी, केंद्रीय सहकार राज्यमंत्री कृष्णपाल गुर्जर, महाराष्ट्राचे सहकारमंत्री बाबासाहेब पाटील, माजी सहकारमंत्री बाळासाहेब पाटील आणि राष्ट्रीय साखर संघाचे अध्यक्ष हर्षवर्धन पाटील यांच्यासह विविध राज्यांचे सहकारमंत्री व मान्यवरांच्या प्रमुख उपस्थितीत हा पुरस्कार वितरीत झाला. कारखान्याच्या वतीने कार्यकारी संचालक राजेंद्र यादव, वर्क्स मॅनेजर नारायण नायकोडे व चीफ केमिस्ट शिवशंकर भोसले यांनी हा मानाचा पुरस्कार स्वीकारला.
शेतकरी, सभासद व कर्मचाऱ्यांच्या परिश्रमाचे फलित
कारखान्याला देशपातळीवरील हा बहुमान मिळाल्याबद्दल कारखान्याचे चेअरमन पुरुषोत्तम जगताप, उपाध्यक्ष तसेच संचालक मंडळाने सभासद, अधिकारी आणि कर्मचाऱ्यांचे मनापासून अभिनंदन केले आहे. या यशाविषयी भावना व्यक्त करताना कार्यकारी संचालक श्री. राजेंद्र यादव म्हणाले, दिवंगत लोकनेते आदरणीय अजितदादा पवार यांच्या नेतृत्वाखाली देशात नावारूपाला आलेला आणि उपमुख्यमंत्री सुनेत्रावहिनी अजितदादा पवार यांच्या मार्गदर्शनाखाली प्रगतीपथावर धावणारा सोमेश्वर कारखाना तंत्रज्ञान आणि व्यवस्थापनात अव्वल ठरला आहे. हा पुरस्कार केवळ कारखान्याचा नसून ऊस उत्पादक शेतकरी, सभासद बांधव, ऊसतोड- वाहतूकदार, कामगार आणि संपूर्ण अधिकारी वर्गाच्या अथक परिश्रमांचे फलित आहे.
१३ वर्षांत १३ राज्य व राष्ट्रीय पुरस्कारांचा विक्रम
गेल्या १३ वर्षांत शेतकऱ्यांना सातत्याने सर्वोच्च ऊसदर देणारा कारखाना म्हणून सोमेश्वरची ख्याती सर्वदूर पसरलेली आहे. २०१३ पासून कारखान्याने नामांकित संस्थांचे तब्बल १३ राज्य व राष्ट्रीय पातळीवरील पुरस्कार पटकावून स्वतःच्या विकासाचा चढता आलेख सिद्ध केला आहे. तांत्रिक क्षमतेचा हा राष्ट्रीय सन्मान सोमेश्वरच्या शिरपेचात आणखी एक मानाचा तुरा रोवणारा ठरला आहे.
