काका यादव, भवानीनगर : सामाजिक कार्याची तब्बल ४५ वर्षांची परंपरा जपणाऱ्या सणसर येथील आझाद तरुण मंडळाने गणेशोत्सवातील उत्कृष्ट कार्याची परंपरा यंदाही कायम ठेवली आहे. सन २०२५ मधील गणेशोत्सवातील उल्लेखनीय कार्याची दखल घेत वालचंदनगर पोलीस ठाण्याच्या हद्दीत मंडळाला प्रथम क्रमांकाचे प्रशस्तीपत्र व सन्मानचिन्ह देऊन गौरविण्यात आले.
विशेष म्हणजे गेल्या सहा वर्षांपासून आझाद तरुण मंडळ सलग प्रथम क्रमांक पटकावत आहे. आगामी २०२६ दहीहंडी व गणेशोत्सवाच्या पार्श्वभूमीवर वालचंदनगर पोलीस ठाण्यात मंडळांच्या पदाधिकाऱ्यांची व कार्यकर्त्यांची आढावा बैठक आयोजित करण्यात आली होती. यावेळी सन २०२५ मधील गणेशोत्सवातील उत्कृष्ट कार्याबद्दल आझाद तरुण मंडळाचा सन्मान करण्यात आला. वालचंदनगर पोलीस ठाण्याचे प्रभारी पोलीस निरीक्षक गोपाळ पवार यांच्या हस्ते मंडळाला प्रथम क्रमांकाचे प्रशस्तीपत्र व सन्मानचिन्ह प्रदान करण्यात आले.
यावेळी पोलीस उपनिरीक्षक घोरपडे, गोपनीय विभागाचे गणेश काटकर तसेच वालचंदनगर पोलीस ठाण्याच्या हद्दीतील विविध दहीहंडी व गणेशोत्सव मंडळांचे पदाधिकारी आणि कार्यकर्ते उपस्थित होते. उत्सव काळात मंडळांनी पोलीस ठाण्याने घालून दिलेल्या नियम व अटींचे काटेकोर पालन करावे, शांतता व सुव्यवस्था अबाधित ठेवण्यासाठी पोलिसांना सहकार्य करावे, असे आवाहन प्रभारी पोलीस निरीक्षक गोपाळ पवार यांनी केले. दरम्यान, नूतन प्रभारी अधिकारी गोपाळ पवार यांचा आझाद तरुण मंडळाच्या वतीने सत्कार करून पुढील कार्यकाळासाठी शुभेच्छा देण्यात आल्या.
४५ वर्षांची सामाजिक कार्याची परंपरा…
आझाद तरुण मंडळ हे गेल्या ४५ वर्षांपासून सणसर परिसरात सामाजिक कार्यात अग्रेसर आहे. मंडळाच्या श्री गणेशाची प्राणप्रतिष्ठा वै. ह.भ.प. गणपत बुवा काळे महाराज यांच्या शुभहस्ते करण्यात आली आहे. गणेशोत्सवाबरोबरच विविध सामाजिक उपक्रमांमध्ये मंडळाचा सातत्याने सहभाग राहिला आहे.
मंडळाच्या सामाजिक व सार्वजनिक कार्याची यापूर्वीही विविध स्तरांवर दखल घेण्यात आली आहे. महाराष्ट्र शासनाच्या २०१६ सालच्या लोकमान्य महोत्सवांतर्गत तालुका स्तरावर प्रथम क्रमांक, २५ हजार रुपये रोख पारितोषिक, प्रशस्तीपत्र व सन्मानचिन्ह मंडळाला मिळाले आहे. तसेच दै. लोकमतचा २०२३ मधील सातत्यपूर्ण उत्कृष्ट सामाजिक कार्याबद्दलचा ‘लोकमत गणनायक पुरस्कार’ही मंडळाला प्राप्त झाला आहे.
कोल्हापूर परिक्षेत्राचे पोलीस महानिरीक्षक डॉ. सुनील फुलारी तसेच पुणे जिल्हा ग्रामीण पोलीस अधीक्षक संदीपसिंह गिल यांच्या हस्तेही मंडळाचा पुरस्कार देऊन गौरव करण्यात आला आहे.
सणसर गावाला सन २००९-१० मध्ये मिळालेला १० लाख रुपयांचा ‘गाव तंटामुक्ती’ पुरस्कार मिळवून देण्यातही आझाद तरुण मंडळाचा मोठा सहभाग होता. सामाजिक बांधिलकी, शिस्तबद्ध उत्सव आयोजन आणि सातत्यपूर्ण कार्याच्या जोरावर मंडळाने सलग सहा वर्षे प्रथम क्रमांकाची मिळविलेली कामगिरी ही सणसरच्या सामाजिक कार्याची प्रेरणादायी परंपरा ठरत आहे.
वालचंदनगर पोलीस स्टेशनच्या कार्यक्षेत्रात सहा वर्षे पहिला क्रमांक मिळविलेल्या या मंडळाचे या कार्यक्रमात प्रकाश शिंदे संस्थापक अध्यक्ष, संजय शिंदे अध्यक्ष आर्यन गुप्ते उपाध्यक्ष, गणेश जाधव सेक्रेटरी अक्षय शिर्के, निखिल कोकाटे, योगीराज गाडे, आकाश कांगळे, चैतन्य शिंदे, प्रज्योत शिंदे, शरद कांबळे माजी ग्रामपंचायत सदस्य हे उपस्थित होते
