बारामती : पुणे जिल्हा शिक्षण मंडळाचे भूतपूर्व अध्यक्ष, महाराष्ट्राचे माजी उपमुख्यमंत्री तसेच ऑलिम्पिक असोसिएशनचे माजी अध्यक्ष दिवंगत अजितदादा पवार यांच्या जयंतीनिमित्त आयोजित करण्यात आलेल्या पुणे ते बारामती राष्ट्रीय व राज्यस्तरीय सायकल स्पर्धेला देशभरातील स्पर्धकांनी उत्स्फूर्त प्रतिसाद दिला.
सायकलिंग फेडरेशन ऑफ इंडिया (नवी दिल्ली), सायकल असोसिएशन ऑफ महाराष्ट्र आणि पुणे जिल्हा शिक्षण मंडळ यांच्या संयुक्त विद्यमाने आयोजित या स्पर्धेत तब्बल ४२५ राष्ट्रीय, आंतरराष्ट्रीय आणि राज्यस्तरीय सायकलपटूंनी सहभाग घेत स्पर्धेला राष्ट्रीय दर्जा प्राप्त करून दिला. या भव्य स्पर्धेचा बक्षीस वितरण सोहळा बारामतीतील गदिमा सभागृहात महाराष्ट्र विधानसभेचे उपाध्यक्ष आण्णा बनसोडे यांच्या हस्ते उत्साहपूर्ण वातावरणात पार पडला.
यावेळी विजेत्या खेळाडूंचा सन्मान करण्यात आला. उपस्थित मान्यवरांनी स्पर्धकांच्या जिद्दीचे आणि उत्कृष्ट कामगिरीचे कौतुक करत ही स्पर्धा महाराष्ट्राच्या क्रीडा क्षेत्रासाठी प्रेरणादायी ठरत असल्याचे सांगितले.
यावेळी बोलताना विधानसभा उपाध्यक्ष आण्णा बनसोडे म्हणाले, “दिवंगत अजितदादा पवार हे शेतकरी, कष्टकरी, बहुजन आणि सर्वसामान्य जनतेच्या प्रश्नांसाठी आयुष्यभर झटणारे नेतृत्व होते.
फुले-शाहू-आंबेडकर यांच्या पुरोगामी विचारांचा वारसा त्यांनी कृतीतून जपला. जाती-पातीचा विचार न करता समाजातील वंचित घटकांच्या मदतीसाठी ते सदैव धावून जात असत. पिंपरी-चिंचवडसह राज्यभर त्यांनी केलेला विकास आजही त्यांच्या कार्याची साक्ष देतो. माझ्यासारख्या सामान्य कार्यकर्त्याला त्यांनी मोठी संधी दिली, हे मी कधीही विसरणार नाही.”
कार्यक्रमाच्या प्रास्ताविकात पुणे जिल्हा शिक्षण मंडळाचे मानद सचिव ॲड. संदीप कदम यांनी सांगितले की, दिवंगत अजितदादा पवार यांच्या प्रेरणेतून सुरू झालेल्या या स्पर्धेचे यंदा दहावे वर्ष असून दरवर्षी या स्पर्धेचा दर्जा उंचावत आहे. राष्ट्रीय, राज्य आणि विविध गटांमध्ये आयोजित करण्यात आलेल्या या स्पर्धेसाठी देशभरातील नामांकित सायकलपटूंनी सहभाग नोंदविला.
स्पर्धेचे नियोजन अत्यंत सूक्ष्म पातळीवर करण्यात आले असून सायकल असोसिएशनच्या पदाधिकाऱ्यांनी सर्व तांत्रिक बाबींची उत्कृष्ट जबाबदारी पार पाडल्यामुळे स्पर्धा यशस्वी ठरली. अशा स्पर्धांमुळे ग्रामीण भागातील युवकांमध्ये क्रीडाविषयी आकर्षण निर्माण होत असून राष्ट्रीय स्तरावर झेप घेण्याची प्रेरणा मिळत असल्याचे त्यांनी नमूद केले.
स्पर्धेतील सर्वाधिक प्रतिष्ठेचा मानला जाणारा दिवे घाटातील ‘राष्ट्रीय घाटाचा राजा’ हा किताब कर्नाटकच्या श्रीनिवास राजपूत यांनी अवघ्या ८ मिनिटे ३२ सेकंदांत घाट सर करून पटकावला. राज्यस्तरीय गटात हा किताब महाराष्ट्राच्या निहाल नदाफ यांनी ८ मिनिटे ४० सेकंदांत जिंकला.
१२२ किलोमीटरच्या पुणे ते बारामती राष्ट्रीय पुरुष गटात मणिपूरच्या अथोकपाम बाईक सिंगे यांनी २ तास २९ मिनिटे अशी प्रभावी वेळ नोंदवत प्रथम क्रमांक पटकावला आणि स्पर्धेचे मानकरी ठरले. तामिळनाडूच्या जोएल सुंदराम यांनी द्वितीय, तर गुजरातच्या ध्रुव दिया यांनी तृतीय क्रमांक मिळवला.
राज्यस्तरीय पुरुष गटात अमन तांबोळी यांनी विजेतेपद पटकावत महाराष्ट्राचा झेंडा उंचावला. हनुमान चोपडे यांनी द्वितीय, तर रेहान शेख यांनी तृतीय क्रमांक मिळवला.
सासवड ते बारामती एमटीबी खुल्या राज्यस्तरीय स्पर्धेत ओंकार खेडकर यांनी प्रथम क्रमांक मिळवला. त्यांच्यामागोमाग स्वराज कराळे आणि वेदांत टिळेकर यांनी अनुक्रमे द्वितीय व तृतीय क्रमांक पटकावला.
महिलांच्या माळेगाव ते बारामती राष्ट्रीय स्पर्धेत कर्नाटकच्या गंगा दांडीन यांनी प्रथम क्रमांक मिळवत उत्कृष्ट कामगिरी केली. महाराष्ट्राच्या योगेश्वरी कदम यांनी द्वितीय, तर राजनंदिनी सोमवंशी यांनी तृतीय क्रमांक मिळवला.
सासवड-बारामती सायक्लोथॉन स्पर्धेत अनुप पवार यांनी प्रथम, अक्रम देवकाते यांनी द्वितीय आणि खदुस शेख यांनी तृतीय क्रमांक पटकावला. कार्यक्रमाच्या प्रारंभी माळसकांत विद्यालयाच्या विद्यार्थ्यांनी आकर्षक योगासनांचे सादरीकरण करून उपस्थितांची मने जिंकली.
या समारंभास पुणे जिल्हा परिषद अध्यक्ष विरधवल जगदाळे, स्वामी रामानंद तीर्थ मराठवाडा विद्यापीठाचे कुलगुरू डॉ. मनोहर चासकर, सावित्रीबाई फुले पुणे विद्यापीठाचे प्र-कुलगुरू डॉ. पराग काळकर, बारामती नगरपरिषदेचे नगराध्यक्ष सचिन सातव, उपाध्यक्षा श्वेता नाळे, राष्ट्रवादी काँग्रेसचे जिल्हाध्यक्ष संभाजी होळकर, रमेश जगताप, संगीता कोकरे, सुयोग सातपुते, संदीप बांदल, अॅड. किरण इंगळे, प्रवीण पाटील, प्राचार्य देविदास वायदंडे, विश्वास देवकाते, विजय कोलते, डॉ. शंतनू जगदाळे, अशोक खळदकर, प्राचार्य भरत शिंदे यांच्यासह विविध क्षेत्रांतील मान्यवर मोठ्या संख्येने उपस्थित होते.
स्पर्धेच्या यशस्वी आयोजनासाठी पुणे जिल्हा शिक्षण मंडळाचे उपाध्यक्ष राजेंद्र घाडगे, मानद सचिव ॲड. संदीप कदम, खजिनदार ॲड. मोहनराव देशमुख, उपसचिव एल. एम. पवार, सहसचिव ए. एम. जाधव, सायकल असोसिएशनचे सचिव संजय साठे, दिपाली पाटील, श्रीनाथ थोरात, सुदाम रोकडे तसेच पुणे जिल्हा शिक्षण मंडळाच्या सर्व शाळा-महाविद्यालयांचे प्राचार्य, मुख्याध्यापक, क्रीडा शिक्षक, शिक्षक, विद्यार्थी आणि शिक्षकेतर कर्मचाऱ्यांनी परिश्रम घेतले. स्पर्धेस विद्या प्रतिष्ठान, बारामती आणि एन्व्हॉर्यमेंटल फोरम ऑफ इंडिया यांचे मोलाचे सहकार्य लाभले.
कार्यक्रमाचे सूत्रसंचालन प्रा. नितीन लगड आणि प्रा. संध्याराणी आटोळे यांनी केले, तर नगराध्यक्ष सचिन सातव यांनी आभार प्रदर्शन करून समारोप केला. राष्ट्रीय स्तरावरील या स्पर्धेमुळे बारामतीची क्रीडा क्षेत्रातील ओळख अधिक भक्कम झाली असून, युवकांमध्ये सायकलिंगसारख्या आरोग्यदायी आणि साहसी क्रीडेबद्दल नवचैतन्य निर्माण झाल्याची भावना उपस्थितांनी व्यक्त केली.
