पुणे, दि. ७ : हडपसर परिसरातील २८ वर्षीय धनराज जयवंत पिसाळ या तरुणाच्या संशयास्पद मृत्यूप्रकरणी त्याला आत्महत्येस प्रवृत्त केल्याचा आरोप करत मंंजरी पोलिसांनी नऊ जणांविरुद्ध गुन्हा दाखल केला आहे. मालमत्ता, आर्थिक व्यवहार आणि सातत्याने होणाऱ्या कथित मानसिक छळामुळे धनराजने टोकाचे पाऊल उचलल्याचा आरोप त्याच्या आईने फिर्यादीत केला आहे.
पोलिसांनी दिलेल्या माहितीनुसार, धनराज पिसाळ हा ३ जुलै रोजी मित्राकडे जात असल्याचे सांगून घरातून बाहेर पडला होता. त्यानंतर ४ जुलै रोजी हडपसरमधील गंधर्व लॉजमध्ये तो बेशुद्ध अवस्थेत आढळून आला. ससून रुग्णालयात डॉक्टरांनी त्याला मृत घोषित केले. विषतज्ज्ञांच्या अहवालानंतर मृत्यूचे नेमके कारण स्पष्ट होणार असल्याचे शवविच्छेदन अहवालात नमूद आहे.
फिर्यादी आशा जयवंत पिसाळ यांनी दिलेल्या जबाबात, मालमत्तेवरील हक्क, जमिनीचे व्यवहार, आर्थिक फसवणूक, वाहन व्यवसाय, गोदामाचा ताबा तसेच सततच्या धमक्या व अपमानामुळे त्यांच्या कुटुंबावर मोठा मानसिक ताण निर्माण झाला होता, असा आरोप केला आहे. या सर्व प्रकारामुळे धनराज नैराश्यात गेला आणि अखेर त्याने आत्महत्या केल्याचा दावा फिर्यादीत करण्यात आला आहे.
या प्रकरणी सतीश हरीश्चंद्र पिसाळ याच्यासह एकूण नऊ जणांविरुद्ध भारतीय न्याय संहिता (BNS) कलम 108, 351(2), 3(5) अन्वये गुन्हा दाखल करण्यात आला आहे. यामध्ये धनराज याची आई आशा जयवंत पिसाळ यांनी दिलेल्या फिर्यादीनुसार पोलिसांनी सतीश हरीश्चंद्र पिसाळ (वय 43) याच्यासह नऊ जणांवर गुन्हा दाखल केला आहे.
