बारामती कृषी उत्पन्न बाजार समितीचे सचिव अरविंद संपतराव जगताप यांच्या २६ वर्षांच्या सेवेनिमित्त आयोजित सत्कार समारंभ मंगळवारी मुख्य बाजार आवारातील नवीन रेशीम मार्केट इमारतीत पार पडला. यावेळी बाजार समितीचे आजी-माजी पदाधिकारी, संचालक, शेतकरी, व्यापारी, हमाल-मापाडी तसेच कर्मचारी मोठ्या संख्येने उपस्थित होते.
कार्यक्रमाची सुरुवात दीपप्रज्वलनाने झाली. प्रास्ताविकात सुनील पवार यांनी जगताप यांच्या सेवाकाळाचा उल्लेख करत त्यांच्या कार्याचा गौरव केला. त्यानंतर सूर्यकांत मोरे यांनी जगताप यांच्या २६ वर्षांच्या सेवाकाळाचा आढावा घेत त्यांच्या प्रशासकीय कार्यपद्धती, राज्यातील सचिव कॅडर समितीवरील जबाबदारी, उत्कृष्ट प्रशासकीय पुरस्कार तसेच उपविभागीय बाजार समिती सेवक पतसंस्थेच्या स्थापनेतील योगदानाचा उल्लेख केला.
यावेळी शरद भोसले यांनी जगताप यांच्या कार्यावर आधारित लघुचित्रफीत सादर केली. त्यामध्ये बाजार समितीच्या विविध विकासकामांचा आढावा घेण्यात आला. उपबाजार आवारासाठी जागा उपलब्ध करून देणे, पेट्रोल व सीएनजी पंप उभारणी, बारामती, जळोची, सुपे आणि झारगडवाडी येथील जागा संपादन, ई-नाम प्रणालीची अंमलबजावणी, रेशीम कोष मार्केट, जळोची येथील नवीन कार्यालयीन इमारत, रयत भवनातील शेतकरी मॉल तसेच व्यापारी गाळ्यांच्या उभारणीसह विविध प्रकल्पांमध्ये जगताप यांच्या योगदानाचा उल्लेख करण्यात आला.
कार्यक्रमात राष्ट्रवादीचे जिल्हाध्यक्ष व जिल्हा बँकेचे संचालक संभाजी होळकर यांनीही मनोगत व्यक्त करत बाजार समितीच्या विकासासाठी विविध प्रकल्पांना मंजुरी व निधी मिळवून देण्यासाठी जगताप यांनी केलेल्या पाठपुराव्याची दखल घेतली. यावेळी अरविंद जगताप यांचा शाल, श्रीफळ, पुष्पगुच्छ आणि स्मृतिचिन्ह देऊन सत्कार करण्यात आला. सत्काराला उत्तर देताना जगताप यांनी आपल्या सेवाकाळात सहकार्य करणारे पदाधिकारी, कर्मचारी, शेतकरी, व्यापारी तसेच सर्व संबंधितांचे आभार मानले.
कार्यक्रमाचे आभार प्रदर्शन उपसभापती अरुण सकट यांनी केले. या प्रसंगी पंचायत समितीचे सभापती किरण तावरे, मार्केट असोसिएशनचे अध्यक्ष संभाजी किर्वे, फळे-भाजीपाला आडतदार संघटनेचे अध्यक्ष सईद बागवान, बाजार समितीचे सभापती विनायक गावडे, उपसभापती अरुण सकट, माळेगाव सहकारी साखर कारखान्याचे संचालक योगेश जगताप, माजी नगरसेवक सुरज सातव यांच्यासह बाजार समितीचे आजी-माजी पदाधिकारी, संचालक, शेतकरी, व्यापारी, हमाल-मापाडी आणि कर्मचारी उपस्थित होते.
