मुंबई : विद्यार्थ्यांच्या आरोग्याचे संरक्षण करण्याच्या उद्देशाने राज्य सरकारने महत्त्वपूर्ण निर्णय घेतला असून, शाळांच्या ५०० मीटर (अर्धा किलोमीटर) परिसरात ‘स्टिंग’सह उच्च कॅफिनयुक्त एनर्जी ड्रिंक्सच्या विक्रीवर बंदी घालण्याचे आदेश जारी केले आहेत. अल्पवयीन मुलांमध्ये एनर्जी ड्रिंक्सचे वाढते सेवन आणि त्याचे आरोग्यावर होणारे दुष्परिणाम लक्षात घेऊन हा निर्णय घेण्यात आला आहे.
आरोग्य तज्ज्ञांच्या मते, एनर्जी ड्रिंक्समध्ये सामान्य शीतपेयांच्या तुलनेत कॅफिनचे प्रमाण अधिक असते. त्याचबरोबर त्यामध्ये मोठ्या प्रमाणात साखर, टॉरीन (Taurine), इनोसिटॉल (Inositol), बी-समूहातील जीवनसत्त्वे, आम्लता नियंत्रक (Citric Acid), कृत्रिम रंग व फ्लेवर्स तसेच कार्बोनेटेड पाण्याचा वापर करण्यात येतो. उत्पादनाच्या देश, बॅच किंवा आवृत्तीनुसार या घटकांमध्ये काही प्रमाणात बदल असू शकतो. याबाबतची अचूक माहिती संबंधित उत्पादनाच्या लेबलवर नमूद केलेली असते.
तज्ज्ञांच्या मते, अशा प्रकारच्या एनर्जी ड्रिंक्सचे वारंवार किंवा जास्त प्रमाणात सेवन केल्यास हृदयाचे ठोके वाढणे, रक्तदाब वाढणे, झोप न लागणे, अस्वस्थता, चिडचिड, डोकेदुखी तसेच जास्त साखरेमुळे लठ्ठपणा आणि दातांच्या समस्या निर्माण होण्याची शक्यता असते. त्यामुळे बालरोग तज्ज्ञ आणि अनेक आंतरराष्ट्रीय आरोग्य संस्था लहान मुले व किशोरवयीन मुलांनी एनर्जी ड्रिंक्सचे सेवन टाळावे, असा सल्ला सातत्याने देत असतात.
राज्य सरकारच्या या निर्णयाचे पालक, डॉक्टर आणि आरोग्य क्षेत्रातील तज्ज्ञांनी स्वागत केले असून, विद्यार्थ्यांमध्ये एनर्जी ड्रिंक्सचे वाढते आकर्षण कमी करण्यासाठी आणि त्यांच्या आरोग्याचे संरक्षण करण्यासाठी हा निर्णय महत्त्वपूर्ण ठरेल, अशी अपेक्षा व्यक्त केली जात आहे.,
