आता चक्क मास्तरांचाच पेपर फुटला!; NEET, TET नंतर परीक्षा व्यवस्थेवर मोठे प्रश्नचिन्ह
पुणे, दि. २७ : आतापर्यंत राजकारणात आमदार, खासदार आणि नेते फुटत असल्याच्या चर्चा होत होत्या. आता मात्र थेट परीक्षांचेच पेपर फुटू लागल्याने शिक्षण व्यवस्थेच्या विश्वासार्हतेवर गंभीर प्रश्न उपस्थित झाले आहेत. NEET, TET आणि विविध भरती परीक्षांतील गैरप्रकारांनंतर आता शिक्षक पात्रता परीक्षा (TET) देखील वादाच्या भोवऱ्यात सापडली आहे.
महाराष्ट्र राज्य परीक्षा परिषदेने जारी केलेल्या अधिकृत प्रसिद्धीपत्रकानुसार, २८ जून रोजी होणाऱ्या TET परीक्षेतील काही प्रश्न परीक्षा सुरू होण्यापूर्वीच सोशल मीडियावर फिरत असल्याची माहिती मिळाल्यानंतर तातडीने चौकशी करण्यात आली. प्राथमिक तपासात काही प्रश्न प्रत्यक्ष प्रश्नपत्रिकेशी मिळतेजुळते असल्याचे आढळल्याने शिरोळ पोलीस ठाण्यात गुन्हा दाखल करण्याची प्रक्रिया सुरू करण्यात आली असून, नियोजित TET परीक्षा पुढे ढकलण्यात आली आहे.
गेल्या काही वर्षांत स्पर्धा परीक्षा, भरती परीक्षा आणि वैद्यकीय प्रवेश परीक्षांमधील गैरप्रकारांनी विद्यार्थ्यांचा विश्वास डळमळीत केला आहे. आता शिक्षक होण्यासाठीची पात्रता परीक्षा देखील संशयाच्या भोवऱ्यात सापडल्याने, “आता नीट, फिट, टीईटी… नेमकं काय राहिलं नाही?” असा संतप्त सवाल विद्यार्थी आणि पालकांकडून उपस्थित केला जात आहे.
शिक्षण व्यवस्था ही समाजाचा पाया मानली जाते. मात्र “मास्तरांचाच पेपर फुटला” ही बाब अत्यंत गंभीर असून, केवळ परीक्षा पुढे ढकलून हा प्रश्न संपणार नाही. दोषींवर कठोर कारवाई करून परीक्षा व्यवस्थेतील त्रुटी कायमस्वरूपी दूर करण्याची मागणी आता जोर धरू लागली आहे.
