बारामती : महान्यूज लाईव्ह
उपमुख्यमंत्री अजित पवार यांनी बारामतीच्या पुण्यश्लोक राजमाता अहिल्यादेवी होळकर शासकीय वैद्यकीय महाविद्यालयातील एकंदर कामकाजाची माहिती घेतल्यानंतर त्यावर आढावा घेतला होता आणि या महाविद्यालयातील अधिष्ठात्याची बदली करण्याचे संकेत दिले होते. मात्र तेवढ्यातच दुर्दैवी घटना घडली आणि मेडिकल कॉलेजचा अनागोंदी कारभार तसाच कायम राहिला, मात्र अजितदादांचे काम सुनेत्रा वहिनींनी सोपे केले.. बारामतीकरांना सातत्याने ज्या समस्यांना सामोरे जावे लागते, ती समस्या होती आढीतले नासके आंबे..!
आता काही जणांच्या म्हणण्यानुसार नासके आंबे दूर झाले असतील, तर उरलेल्या सगळ्यांनी कामाला सुरुवात करावी. काही दिवसांपूर्वीच सुनेत्रा पवार यांनी अचानक भेट देत या रुग्णालयातील नेमक्या कुरघोड्या काय आहेत, याचे सूक्ष्म बारकावे टिपत माहिती घेतली. आणि त्यानंतर वेळ न दवडता सुनेत्रा पवार यांनी अत्यंत आक्रमकपणे या शासकीय वैद्यकीय महाविद्यालयाची घडी व्यवस्थित बसवण्यासाठी स्वतःला प्रमुख म्हणून घेणारे आणि इथे जणू मीच महत्त्वाचा असे समजणारे सगळेच बदलले.
या बदल्या अगोदरच होणार होत्या, पण..
आणखी एक महत्त्वाची बाब म्हणजे या शासकीय वैद्यकीय महाविद्यालयातील कामकाजातील अव्यवस्थितपणाला प्रमुख देखील जबाबदार असल्याची माहिती अजितदादांपर्यंत पोहोचली होती. अजितदादांनी बदलीचे आदेश काढण्याचे आदेश तर दिले, मात्र मंत्रालयापर्यंत आपली सेटिंग करून ठेवलेल्या अधिकाऱ्याला आपली बदली होणार असल्याचे कळले आणि त्यांनी लागलेच पुन्हा रदबदली करण्याची प्रक्रिया सुरू केली आणि त्याची बदली रखडली.
त्यानंतर काल-परवा जेव्हा उपमुख्यमंत्री सुनेत्रा पवार यांनी बारामतीच्या वैद्यकीय महाविद्यालयाला भेट दिली तेव्हा तेथील अव्यवस्थितपणा व विस्कळीत नियोजन त्यांच्या नजरेस आले आणि त्यांनी प्रचंड नाराजी व्यक्त केली. मात्र त्यानंतर आपल्या चुका सुधारण्याच्या ऐवजी इथला स्थानिक अधिकारी आपल्या मर्जीतील काही लोकांना राजकीय नेतृत्वापर्यंत पाठवून काहीच घडले नसल्याचा अविर्भाव आणत होता.
अर्थात सुनेत्रा पवार येऊन गेल्यानंतर काही दिवस उलटले तरी, प्रशासकीय बदल काहीच झाला नाही, त्यामुळे त्याने केलेली सेटिंग बरोबर होती, असा समज देखील अनेकांचा झाला. मात्र काल रात्री जेव्हा उचलबांगडी झाली. तेव्हा अनेकांनी सुटकेचा निःश्वास टाकला. आता मेडिकल कॉलेजमधील घाण बाहेर गेली आहे, मीच राजकीय नेतृत्वाच्या जवळचा असे म्हणून अधिकाऱ्यांना समज करून देऊन इथे सर्वेसर्वा होण्याचा प्रयत्न जे कोणी करत होते त्यांना देखील सुनेत्रा पवार यांनी योग्य संदेश पोहोचवला आहे. आता शासकीय वैद्यकीय महाविद्यालयातील कामकाजात सुसूत्रता येईल अशी अपेक्षा आहे.
