राज्याला हादरवणारे दौंडमधील स्त्री-भ्रूणहत्या प्रकरण थांबेना!
राजेंद्र झेंडे,महान्युज लाईव्ह
दौंड : स्त्री-भ्रूणहत्येसारख्या सामाजिक कलंकाविरोधात पुणे ग्रामीण पोलिसांची धडक कारवाई सुरूच आहे. बेकायदेशीर लिंग निदान व स्त्री-भ्रूणहत्येचे मोठे रॅकेट उघडकीस आणत यवत पोलिसांनी केडगाव येथील ‘पार्थ हॉस्पिटल’च्या संचालिका डॉ. संगीता पांडुरंग गायकवाड (वय ६१) यांना अटक केली आहे. न्यायालयाने त्यांना १९ जूनपर्यंत पोलीस कोठडी सुनावली आहे.
या गुन्ह्यात यापूर्वी अटक केलेला मुख्य आरोपी अण्णासाहेब आप्पा गिरी (वय ४३, रा. केडगाव, मूळ हंगा, ता. पारनेर) हा कोणताही अधिकृत परवाना किंवा वैद्यकीय पदवी नसलेला बोगस डॉक्टर आहे. हा तोतया डॉक्टर पोर्टेबल सोनोग्राफी मशीनद्वारे गरोदर महिलांचे बेकायदेशीर लिंग निदान करत होता. तपासात समोर आलेल्या माहितीनुसार, गर्भ मुलीचा असल्याचे कळताच तो महिलांना बेकायदेशीर गर्भपातासाठी केडगावच्या पार्थ हॉस्पिटलमध्ये पाठवत असे.
पार्थ हॉस्पिटलच्या संचालिका डॉ. संगीता गायकवाड कोणत्याही नैतिक व कायदेशीर पात्रतेशिवाय अशा महिलांचे बेकायदेशीररित्या गर्भपात करत होत्या. विशेष तपास पथकाने (SIT) केलेल्या सखोल तपासात त्यांच्याविरुद्ध भक्कम पुरावे मिळाले. त्यानुसार बुधवार, दि. १७ रोजी त्यांना अटक करण्यात आली.
गुन्ह्याचे गांभीर्य लक्षात घेऊन तपासात निष्पन्न पुराव्यांच्या आधारे कठोर कलमांची वाढ करण्यात आली आहे. यवत पोलीस स्टेशन गुन्हा रजि. क्र. ४६६/२०२६ मध्ये भारतीय न्याय संहिता (BNS) कलम ९१, ३(५), ८८ सह PCPNDT Act कलम ६(ब), ६(क), १८, २३, २५ आणि MTP Act १९७१ चे कलम ४, ६ अन्वये गुन्हा दाखल आहे. आरोपीला दौंड न्यायालयात हजर केले असता १९ जूनपर्यंत पोलीस कोठडी देण्यात आली.
“स्त्री-भ्रूणहत्या हा केवळ कायदेशीर गुन्हा नसून मानवी मूल्ये आणि सामाजिक संतुलनाला काळीमा फासणारा अमानुष अपराध आहे. पैशांच्या हव्यासापोटी निसर्ग आणि कायद्याची पायमल्ली करणाऱ्या विकृतीला पाठीशी घालणाऱ्यांविरुद्ध पुणे ग्रामीण पोलीस कठोर पावले उचलत आहेत,” असे पोलीस प्रशासनाने स्पष्ट केले.
पोलीस अधीक्षक संदीप सिंह गिल, अप्पर पोलीस अधीक्षक गणेश बिराजदार, आर्थिक गुन्हे शाखेचे पोलीस उपाधीक्षक राजेंद्र मायने यांच्या मार्गदर्शनाखाली यवत पोलीस ठाण्याचे विशेष तपास पथक (SIT) या गुन्ह्याचा अधिक तपास करत आहे. अशा अमानुष कृत्ये करणाऱ्यांची गय केली जाणार नाही, असा सज्जड इशारा पोलिसांनी दिला आहे.
