मुंबई : महान्यूज लाईव्ह
राष्ट्रवादी काँग्रेस पक्षाच्या वर्धापन दिनाच्या कार्यक्रमात पक्षाच्या दोन ज्येष्ठ नेत्यांमधील मिश्किल संवादाने उपस्थितांचे विशेष लक्ष वेधून घेतले. राज्याच्या राजकारणात आपल्या स्पष्टवक्तेपणासाठी ओळखले जाणारे छगन भुजबळ आणि प्रदेशाध्यक्ष सुनील तटकरे यांच्यात कबड्डी, बुद्धिबळ आणि राजकारणाच्या खेळावरून झालेली टोलेबाजी कार्यक्रमातील चर्चेचा प्रमुख विषय ठरली.
राज्यसभा उमेदवारीच्या पार्श्वभूमीवर काही दिवसांपासून सुरू असलेल्या चर्चांनंतर भुजबळ यांनी आपण कबड्डीचे खेळाडू आहोत, बुद्धिबळाचे नाही असे विधान केले होते. या विधानाची राजकीय वर्तुळात मोठी चर्चा झाली होती. त्याचाच संदर्भ घेत सुनील तटकरे यांनी वर्धापन दिनाच्या भाषणात भुजबळांवर मिश्किल शब्दांत टिप्पणी केली. भुजबळ साहेब कबड्डीचे उत्तम खेळाडू आहेत. खोलवर चढाई कशी करायची हे त्यांना चांगले माहीत आहे. एवढेच नव्हे तर बुद्धिबळातील डावपेचही त्यांना उत्तम प्रकारे अवगत आहेत असे म्हणत तटकरेंनी भुजबळांच्या विधानाला हलक्याफुलक्या शैलीत उत्तर दिले.
मात्र आपल्या खास शैलीत प्रत्युत्तर देताना छगन भुजबळ यांनीही राजकीय संदेश देण्याची संधी सोडली नाही. खेळात राजकारण करू नका आणि राजकारणाचा खेळही करू नका असे सूचक वक्तव्य करत त्यांनी उपस्थितांचे लक्ष वेधून घेतले. भुजबळांच्या या वक्तव्याने सभागृहात हशा पिकला आणि उपस्थित कार्यकर्त्यांनी टाळ्यांच्या गजरात प्रतिसाद दिला. दोन्ही नेत्यांमधील हा संवाद वरकरणी विनोदी वाटत असला तरी त्यामागे पक्षांतर्गत राजकीय घडामोडींचे संकेत दडले असल्याची चर्चा राजकीय वर्तुळात सुरू आहे.
राज्यसभा उमेदवारीपासून ते पक्षातील निर्णय प्रक्रियेपर्यंत अनेक मुद्द्यांवर सुरू असलेल्या चर्चांच्या पार्श्वभूमीवर या वक्तव्यांकडे पाहिले जात आहे.
राष्ट्रवादी काँग्रेसच्या वर्धापन दिनाचा कार्यक्रम पक्षाची ताकद, संघटनात्मक विस्तार आणि आगामी राजकीय दिशा यासाठी आयोजित करण्यात आला होता. मात्र भाषणांदरम्यान रंगलेल्या या शाब्दिक जुगलबंदीने कार्यक्रमाला वेगळीच रंगत आणली. कबड्डीच्या चढाईचा उल्लेख, बुद्धिबळातील डावपेचांची चर्चा आणि राजकारणाच्या खेळाबाबतचा सल्ला यामुळे उपस्थितांमध्येही उत्सुकता निर्माण झाली.
