बारामती : महान्यूज लाईव्ह
स्वार्थ आणि धावपळीच्या युगातही प्रामाणिकपणा जपणारी माणसे समाजात आहेत, याचा प्रत्यय बारामतीत घडलेल्या एका प्रेरणादायी घटनेतून आला आहे. बसमध्ये सापडलेली रोख रक्कम आणि दागिने स्वतःकडे न ठेवता थेट पोलीसांच्या स्वाधीन करून एका महिलेने सामाजिक जबाबदारीचे उत्तम उदाहरण घालून दिले आहे.
अहिल्यानगर ते बारामती असा प्रवास करत असताना सौ. गौरी अनिल दाने (वय २६) यांना बसमध्ये एक छोटी पर्स आढळून आली. पर्सची पाहणी केली असता त्यामध्ये ६ हजार रुपये रोख रक्कम तसेच सोन्याचे असल्याचा संशय असलेले दोन कानातील झुमके आढळून आले.
अशा परिस्थितीत अनेकदा सापडलेली वस्तू दुर्लक्षित केली जाते किंवा स्वतःकडे ठेवण्याचा मोह होऊ शकतो. मात्र सौ. दाने यांनी प्रामाणिकपणा आणि नागरिक म्हणून असलेली जबाबदारी जपत हा मुद्देमाल थेट बारामती शहर पोलीस ठाण्यात जमा केला. संबंधित वस्तूंचा खरा मालक शोधून त्याला त्या परत मिळाव्यात, या उद्देशाने त्यांनी कोणत्याही अपेक्षेशिवाय हा निर्णय घेतला.
या कृतीमुळे समाजात प्रामाणिकपणा, विश्वास आणि नैतिक मूल्ये आजही जिवंत असल्याचा सकारात्मक संदेश गेला आहे. नागरिकांनी अशा घटनांमधून प्रेरणा घेऊन सापडलेल्या वस्तू त्यांच्या मूळ मालकांपर्यंत पोहोचविण्यासाठी पोलीस प्रशासनाला सहकार्य करावे, असे आवाहनही करण्यात आले.
बारामती शहर पोलीस ठाण्याचे प्रभारी पोलीस निरीक्षक श्रीशैल चिवडशेट्टी यांनी सौ. गौरी दाने यांच्या प्रामाणिकपणाचे विशेष कौतुक करत त्यांचे अभिनंदन केले. त्यांच्या या कृतीमुळे केवळ एका व्यक्तीचा प्रामाणिकपणा अधोरेखित झाला नसून समाजातील नैतिक मूल्यांचे संवर्धन करणारा आदर्श निर्माण झाला आहे.
सौ. गौरी दाने यांनी दाखविलेली ही सामाजिक बांधिलकी आणि प्रामाणिकता नागरिकांसाठी प्रेरणादायी ठरत असून, अशाच सजग आणि जबाबदार नागरिकांमुळे समाज अधिक विश्वासार्ह, सुरक्षित आणि सुसंस्कृत बनत असल्याची भावना व्यक्त केली जात आहे.
