विक्रम वरे : महान्यूज लाईव्ह
बारामती : आपल्या कडक आणि धडाकेबाज प्रशासकीय शैलीसाठी ओळखले जाणारे वरिष्ठ आयएएस अधिकारी तुकाराम मुंढे यांनी अन्न व औषध प्रशासन (FDA) आयुक्तपदाचा पदभार स्वीकारताच राज्यभर नियमबाह्य कामांवर कारवाईचा सपाटा लावला आहे. त्यांच्या या आक्रमक भूमिकेचा परिणाम आता बारामतीसह राज्यातील अनेक शहरांमध्ये दिसून येत असून,बारामतीत नुकताच FDA ने धाड टाकून गुटखा जप्त करून गुन्हा दाखल केला आहे.तसेच परवाना नसलेले किंवा नियमांचे पालन न करणारे अनेक खाद्यपदार्थ विक्रेते, टपरीधारक आणि दुकानदार सावध झाले आहेत.
मुंढे यांची २१ वर्षांच्या प्रशासकीय सेवेत ही तब्बल २५ वी बदली आहे. यापूर्वी त्यांनी विविध महत्त्वाच्या पदांवर काम करताना भ्रष्टाचार, अनियमितता आणि प्रशासनातील ढिलाईविरोधात कठोर भूमिका घेतली होती. त्यामुळे त्यांच्या प्रत्येक नियुक्तीकडे नागरिक आणि प्रशासनाचे विशेष लक्ष असते. अन्न व औषध प्रशासन आयुक्तपदाची सूत्रे हाती घेतल्यानंतर त्यांनी राज्यभरातील खाद्य व्यवसायांची तपासणी, परवाना पडताळणी, अन्न सुरक्षेच्या नियमांचे पालन आणि बनावट किंवा निकृष्ट दर्जाच्या उत्पादनांवर कारवाई यावर भर दिला आहे. त्यांच्या आदेशानंतर FDA च्या पथकांनी विविध राज्यात धाडसत्र सुरू केले असून अनेक ठिकाणी परवाना नसलेल्या व्यवसायांवर कारवाई करण्यात आली आहे.
बारामती शहरातही या कारवाईची चर्चा रंगली आहे. FDA च्या तपासणीची शक्यता लक्षात घेऊन काही टपरीधारक आणि खाद्यपदार्थ विक्रेत्यांनी स्वतःहून दुकाने बंद ठेवणे किंवा आवश्यक कागदपत्रांची पूर्तता करण्यासाठी तात्पुरती कामकाज थांबवणे पसंत केल्याचे चित्र दिसून आले. त्यामुळे “तुकाराम मुंढे यांची दहशत” अशी चर्चा नागरिकांमध्ये सुरू झाली आहे.
दरम्यान,राज्यातील अनेक ठिकाणी FDA च्या कारवायांमुळे बनावट अन्नपदार्थ, मुदतबाह्य उत्पादने, परवान्याविना सुरू असलेले व्यवसाय आणि नियमांचे उल्लंघन करणाऱ्या आस्थापनांवर अंकुश बसण्यास सुरुवात झाली आहे. त्यामुळे ग्राहकांच्या आरोग्याच्या दृष्टीने ही मोहीम महत्त्वाची मानली जात आहे. तुकाराम मुंढे यांच्या कार्यशैलीमुळे पुन्हा एकदा प्रशासनात शिस्त आणि कायद्याची अंमलबजावणी यावर भर दिला जात असून, आगामी काळात अन्न व औषध प्रशासनाच्या कारवाया आणखी तीव्र होण्याची शक्यता व्यक्त केली जात आहे.
