जगातील आघाडीची सोशल मीडिया कंपनी मेटाने मोठ्या प्रमाणावर कर्मचाऱ्यांची कपात करत तब्बल ८ हजार कर्मचाऱ्यांना एका झटक्यात नोकरीवरून कमी केल्याची धक्कादायक माहिती समोर आली आहे. फेसबुक आणि इन्स्टाग्रामची मूळ कंपनी असलेल्या मेटाने ही कारवाई अत्यंत अचानक आणि कोणतीही पूर्वसूचना न देता केल्याने टेक इंडस्ट्रीत खळबळ उडाली आहे.
ब्लूमबर्गच्या वृत्तानुसार, अमेरिका, ब्रिटनसह विविध देशांतील अनेक कर्मचाऱ्यांना ‘वर्क फ्रॉम होम’ करण्यास सांगण्यात आले होते. मात्र, कर्मचाऱ्यांनी सकाळी सिस्टम सुरू करताच त्यांना कामाऐवजी थेट नोकरी संपवल्याचा ई-मेल पाहायला मिळाला. विशेष म्हणजे सिंगापूरमधील कर्मचाऱ्यांना स्थानिक वेळेनुसार पहाटे ४ वाजता हा ई-मेल पाठवण्यात आला.
या निर्णयामुळे मेटाच्या एकूण कर्मचाऱ्यांपैकी जवळपास १० टक्के वर्कफोर्स कमी झाली आहे. मेटाचे CEO मार्क झुकरबर्ग यंदा आर्टिफिशियल इंटेलिजन्स (AI) क्षेत्रात अब्जावधी डॉलरची गुंतवणूक करण्याच्या तयारीत आहेत. कंपनीचा वाढता AI फोकस आणि खर्च नियंत्रण धोरण यामुळे कर्मचाऱ्यांवर गंडांतर आल्याचे बोलले जात आहे.
सध्या संपूर्ण टेक इंडस्ट्रीतच मोठ्या प्रमाणावर छाटणी सुरू असून, AI मुळे अनेक पारंपरिक नोकऱ्यांवर संकट निर्माण होत असल्याची चर्चा आहे. मेटाच्या या निर्णयामुळे सोशल मीडिया आणि आयटी क्षेत्रातील कर्मचाऱ्यांमध्ये भीतीचे वातावरण निर्माण झाले आहे.
