पुणे : महान्यूज लाईव्ह
पुण्यातील हडपसर येथील रुग्णालयाबाहेर जिवंत बॉम्ब (IED) ठेवून महाराष्ट्र हादरवणाऱ्या मुख्य आरोपी शिवाजी राठोड याला अखेर अटक करण्यात महाराष्ट्र एटीएस (दहशतवाद विरोधी पथक) आणि पोलिसांना मोठे यश आले आहे. नागपूर रेल्वे स्टेशनवर अत्यंत गुप्तपणे रचलेल्या थरारक सापळ्यात शिवाजी राठोड पोलिसांच्या जाळ्यात अडकला. आरोपीने आपल्या गुन्ह्याची कबुली दिली असून, या मोठ्या कारवाईमुळे सुरक्षा यंत्रणांनी सुटकेचा श्वास घेतला आहे.
नागपूर रेल्वे स्टेशनच्या प्लॅटफॉर्म ६ वर कसा घडला थरार?
पुण्यात बॉम्ब ठेवून आरोपी शिवाजी राठोड हा ‘आझाद हिंद एक्सप्रेस’ने पळ काढत असल्याची पक्की माहिती एटीएसला मिळाली होती. ही गाडी नागपूर रेल्वे स्थानकाच्या प्लॅटफॉर्म क्रमांक ६ वर येणार होती. गाडी स्टेशनवर पोहोचण्यापूर्वीच एटीएस आणि स्थानिक पोलिसांच्या पथकाने संपूर्ण प्लॅटफॉर्मवर साध्या वेशात दबा धरला होता.
प्रवाशांची गर्दी आणि रेल्वेची वेळ साधत जशी आझाद हिंद एक्सप्रेस प्लॅटफॉर्म ६ वर थांबली, तसा शिवाजी राठोड डब्यातून खाली उतरला. तो पळून जाण्याच्या तयारीत असतानाच, आधीच सज्ज असलेल्या एटीएसच्या पथकाने त्याला चहुबाजूंनी घेरले. अचानक झालेल्या या कारवाईमुळे शिवाजीला सावरण्याची संधीच मिळाली नाही. अत्यंत शिताफीने आणि कोणताही अनुचित प्रकार न घडू देता एटीएसने त्याला ताब्यात घेतले. सध्या त्याची नागपूर एटीएस कार्यालयात कसून चौकशी सुरू आहे.
पुणे ते नागपूर: पोलीस आणि एटीएस यंत्रणा आरोपीपर्यंत कशी पोहोचली?
बुधवारी सायंकाळी हडपसरच्या उषाकिरण रुग्णालयाबाहेर जिवंत बॉम्ब सापडल्यानंतर केंद्रीय यंत्रणा आयबी (इंटेलिजन्स ब्युरो), महाराष्ट्र एटीएस आणि पुणे पोलीस हायअलर्टवर आले होते. आरोपीपर्यंत पोहोचण्यासाठी पोलिसांनी चक्रव्यूह रचला होता : १०० हून अधिक सीसीटीव्ही फुटेजचा तपास : पोलिसांनी हडपसर आणि परिसरातील १०० पेक्षा जास्त सीसीटीव्ही कॅमेऱ्यांचे फुटेज रात्रं-दिवस एक करून तपासले. यात एका संशयित व्यक्तीच्या हालचाली टिपल्या गेल्या.
१५ ते १८ जणांची चौकशी : संशयास्पद हालचालींवरून पोलिसांनी सुरुवातीला १५ ते १८ जणांना ताब्यात घेऊन त्यांची कसून चौकशी केली. यातून काही महत्त्वाचे धागेदोरे हाती लागले. तांत्रिक विश्लेषण आणि लोकेशन ट्रॅकिंग: सीसीटीव्ही फुटेजमधून आरोपीचा चेहरा स्पष्ट झाल्यानंतर पोलिसांनी तांत्रिक विश्लेषण (Technical Intelligence) सुरू केले. आरोपीचा मोबाईल आणि इतर तांत्रिक पुराव्यांच्या मदतीने त्याचे लाईव्ह लोकेशन ट्रॅक करण्यात आले.
नागपूर कनेक्शन उघड : तांत्रिक तपासात आरोपी शिवाजी राठोड हा नागपूरच्या दिशेने प्रवास करत असल्याचे उघड झाले. पुणे पोलिसांनी तातडीने ही माहिती नागपूर एटीएस आणि रेल्वे पोलिसांना दिली. त्यानुसार नागपूर स्टेशनवर सापळा रचून या थरारक प्रवासाचा आणि आरोपीच्या पळवाटांचा शेवट करण्यात आला.
थोडक्यात काय होते प्रकरण?
पुण्याच्या हडपसर परिसरातील कामधेनू इस्टेट येथील उषाकिरण रुग्णालयाबाहेर जिवंत आयईडी (IED) बॉम्ब सापडल्याने खळबळ उडाली होती. बॉम्बशोधक व नाशक पथकाने (BDDS) वेळेत बॉम्ब निकामी केल्याने मोठी दुर्घटना टळली. या संपूर्ण कटाचा सूत्रधार शिवाजी राठोड असून त्याने आता गुन्ह्याची कबुली दिली आहे. तो हे कृत्य का करत होता? याचा पुढील तपास एटीएस करत आहे.
