इंदापूर : महान्यूज लाईव्ह
इंदापूर तालुक्यातील इंदापूर तहसील कार्यालयात महसूल सहाय्यक म्हणून कार्यरत असलेल्या कावेरी विजय खाडे या महिलेला शेतकऱ्याकडून २५ हजाराची लाच घेतल्याप्रकरणी लाच लुचपत प्रतिबंधक विभागाने अटक केली होती तिला इंदापूरच्या न्यायालयाने दोन दिवसांची पोलीस कोठडी दिली आहे. संभाषणामध्ये साहेबांसाठी आणि तिच्यासाठी तिने पैसे मागितले होते. आता हा साहेब कोण? याचा तपास करायचा आहे!
इंदापूर तालुक्यातल्या भांडगाव येथील शेतकऱ्याच्या रस्ता प्रकरणात लाच मागणाऱ्या कावेरी खाडे हिला पुण्याच्या लाच लुचपत प्रतिबंधक विभागाने पकडले होते. यामध्ये तपासादरम्यान तिने स्वतःसाठी आणि साहेबांसाठी पैसे मागितले होते. आता यातील ज्याच्याकडे निम्मे पैसे जाणार होते, तो साहेब कोण? हे तपासायचे असल्याने विशेष सरकारी वकील एडवोकेट प्रसन्न जोशी यांनी जिल्हा न्यायाधीश यु. एम. मुधोळकर यांच्याकडे अधिक तपासासाठी पोलीस कोठडीची मागणी केली.
त्यावरून न्यायाधीशांनी दोन दिवसांची पोलीस कोठडी दिली आहे. आता तपास लाचलुचपत प्रतिबंधक विभागाने आणि पोलिसांनी करायचा आहे. हा खरोखरच मनापासून तपास होणार का आणि खरोखरच यातील साहेब समोर येणार का? हे या दोन दिवसात समजेल. बऱ्याचदा लाचखोरीत अडकलेल्या सापडलेल्या अधिकारी कर्मचाऱ्यांच्या पुढील तपासातून समोर येत नाही, मात्र इंदापूरच्या प्रकरणात लाचखाऊ बाई बरोबर लाचखाऊ साहेब देखील सापडणार का? याची आता उत्सुकता आहे.
या घटनेची पूर्वपिटिका अशी आहे, भांडगाव येथील शेतकरी हनुमंत मदने यांच्या वडिलांची एक एकरच्या आसपास जमीन आहे. त्या जमिनीत जाण्यासाठी रस्ता नव्हता. त्याबाबत सन २०२० पासून तहसीलदारांकडे दावा सुरू आहे. याबाबत तहसीलदार इंदापूर यांची सुनावणी होऊन निकाल देणेबाबतची प्रक्रिया बाकी होती. त्यांनी शेतीसाठी रस्ता मिळावा, म्हणून सन २०२० मध्ये इंदापूर तहसील कार्यालयात अर्ज केला होता.
एक वर्षापासून ते इंदापूर तहसील कार्यालयात रस्ता मिळावा म्हणून अधिकाऱ्यांना भेटत होते. मात्र हेलपाट्याशिवाय पदरात काही पडत नव्हते, म्हणून त्यांनी सहाय्यक महसूल अधिकारी कावेरी खाडे हिला पुन्हा भेटून आपली कैफियत मांडल्यानंतर तिने ५० हजार रुपये द्या, तुमचे काम होईल म्हणून सांगितले.
मात्र या शेतकऱ्याने माझी शेती पडीक आहे, त्यामुळे मला एवढे पैसे द्यायला जमणार नाही असे खाडे यांना सांगितल्यानंतर शेवटी २५ हजार रुपयांवर तडजोड ठरली. मात्र चार वर्ष रस्त्यासाठी हेलपाटे मारून पदरी निराशाच मिळालेल्या व पैसेखाऊ प्रशासनाच्या तगाद्याला कंटाळून या शेतकऱ्याने नाईलाजाने लाचलुचपत प्रतिबंधक विभागाशी संपर्क साधला.
लाचलुचपत प्रतिबंधक विभागाने पडताळणी केली, तेव्हा खाडे या महिलेने लाच मागितल्याचे निष्पन्न झाले. त्यावरून लाचलुचपत प्रतिबंधक विभागाच्या पथकाने खात्री करून आज इंदापूर तहसील कार्यालयात सापळा रचला आणि लाच स्वीकारताना कावेरी खाडे हिला रंगेहाथ पकडण्यात आले होते.
