बापू जगताप, कांबळेश्वर बारामती.
काही दिवसांपूर्वीचा किस्सा! एकजण गडबडीने आपल्या नातवाच्या दवाखान्याच्या कामकाजाच्या निमित्ताने मुसळेसाहेबांसमोर आला.. बहुदा दादांनी अगोदरच सूचना केली असावी.. पण समोरचं काम पाहत पाहत, आणखी कोणाचा तरी फोन घेत.. समोर पाहत, लागलीच आपल्या सोबतीच्या व्यक्तीला एक फोन लावायला लावला.. पलिकडून फोन उचलताच अदबीने त्यांच्याशी बोलत निरोप दिला.. पुन्हा मान खाली घालून राहिलेले समोरचे काम सुरू होते..!
आजोबा म्हणणाऱ्या त्या व्यक्तीने आपले काम सांगण्याच्या अगोदरच मुसळे साहेबांनी एका मिनिटात त्यांचे काम कसे झाले आहे, हे सांगत आता झालेला फोन त्यासाठीच होता. अजित दादांनी खास तुमच्यासाठी सूचना दिलेल्या आहेत, त्यामुळे तुम्ही अमुकतमुक डॉक्टरांकडे जा.. माझा निरोप द्या.. मी फोन केलेला आहे, ऑपरेशन होऊन जाईल.. असे उत्तर दिले आणि पुन्हा कामात डोकावले.. आपले काम झाल्याचा आनंद मानणाऱ्या त्या व्यक्तीने आभारही मानू नयेत, एवढं सहजगत्या कोण वागू शकतं?
मुसळेसाहेबांना भेटून खाली उतरताना ती व्यक्ती सहजगत्या तिथे बसलेल्या लोकांना आपसूकपणे बोलून गेली… अवं, दादांकडे काम करायचं म्हणजे काय सोपं काम आहे का? पण हा माणूस आहे की, मशीन? काही बोलायच्या आत काम पण झालं! आन् मेमरी म्हणजे इचारूच नका, अवं गुगलचीबी गरजच पडायची नाय की वो..!
काम को अंजाम दो! हे ब्रीदवाक्य घेऊन मागील जवळपास तीस वर्षांपासून जनसेवेत अविरत कार्यरत राहणारे अवलिया आहेत उपमुख्यमंत्री अजितदादा पवार यांचे विशेष कार्यकारी अधिकारी सुनीलकुमार मुसळे! प्रत्येकालाच हवाहवासा वाटणारा हा माणूस रंगात रंगूनी रंग माझा वेगळा.. असंच काहीसं दाखवून जातो.. आपलं या माणसाशी कैक वर्षांचं खूप जवळचं नातं आहे असं प्रत्येकाला भेटून झाल्यानंतर वाटत राहतं..!
आज राज्यातील राजकीय वातावरणात काम करणाऱ्या सर्वच पक्षातील पदाधिकाऱ्यांना अजित दादांमुळे सुनीलकुमार मुसळे चांगलेच परिचित आहेत. एखाद्या अत्यंत कामात मग्न असलेल्या व कामाची तडप असलेल्या नेत्याच्या मागेपुढे सातत्याने सावलीसारखी उभे राहायचे हे काम सोपे नाही. मुसळेसाहेब यांचा कामाचा व्याप भला मोठा आहे. त्यांच्या कामामुळे केलेल्या मदतीमुळे हजारो लोकांच्या तोंडात त्यांचे नाव सहज येते.
मागील किमान पंधरा वर्षांपासून मी मुसळे साहेब यांना जवळून पाहत आहे. राज्यसभेच्या खासदार सुनेत्रावहिनींच्या मार्गदर्शखाली ग्रामस्वच्छता अभियानात आम्ही दोघेही सहभागी होतो. अनेक कामे केली आणि विशेष आजही मी त्यांच्यासोबत अनेक कामात बरोबर असतो. प्रत्येकाला आपला वाटावा असा हा माणूस आहे. अर्थात हे व्यक्तिमत्व कमालच आहे. सोबत दोन फोन, आयपॅड, कामाची यादी, हायलायटर, दोन पेन, छोटी डायरी, आवश्यक ते सर्व साहित्य असे एक छोटे ऑफिस सोबत घेऊनच ते कार्यरत असतात.
अजितदादांच्या कामाची पद्धत राज्याला माहित आहे. त्यांचे PA म्हणून काम करणे म्हणजे माणूस तेवढा परिपूर्ण आणि updated पाहिजे. मुसळेसाहेब या दोन्ही बाबीतीत अगदी फिट्ट बसणारे व्यक्तिमत्व आहे. प्रत्येक मिनिटाला यांचा फोन वाजतो …येणारा प्रत्येक फोन ते घेतात त्याला उत्तर देतात. समोरच्या माणसाचे काम समजून घेऊन काम मार्गी देखील लावतात.
आदरणीय दादांच्यामुळे आपले काम झाले आहे, हे ते समोरच्या माणसाला आवर्जून सांगतात आणि म्हणूनच काम बोलते, हे त्याचे वाक्य त्यांच्याच बाबतीत अगदी तंतोतंत खरे ठरते. एकाच वेळी अनेक कामे चोख करणे हा मुसळेसाहेब यांचा हातखंडा आहे.
मला तर हा माणूस कधी झोपतो आणि कधी उठतो हे आजही समजलेले नाही. कारण लोकांना चोवीस तास availble असणे हे जेवढे वाटते तेवढे सोपे नाही. आजचा काळ कृत्रिम बुद्धिमतेचा आहे, मात्र मागील कोणत्या वर्षी काय झाले याची इत्यंभूत माहिती यांच्या कमालीच्या नैसर्गिक मेमरीत साठवलेली आहे. आजच्या तरुणपिढीला जे माहित नाही, ते updated तंत्रज्ञान मुसळेसाहेब यांनी आत्मसात केले आहे.
वर्तमानपत्रातील लेख, राज्यातील विविध क्षेत्रातील लोकांचे फोन नंबर काहीही विचारा. यांच्याजवळ ते उपलब्ध असतेच. जुन्या नव्या गाण्यांचा अल्बम ते गजल आणि भैरवी पर्यंत सगळं संगीत क्षेत्र देखील यांचं तोंडपाठ आहे. माणूस आज दिवसेंदिवस कृत्रिम होत असताना, कृत्रिम जगावर अवलंबून असताना, नैसर्गिक बुद्धिमत्ता जपून आपले काम करणे हे यांच्याकडून शिकता येते.
अनेक वर्तमानपत्रातील चांगले वैचारिक लेख असोत, अथवा चांगली माणसांची मैफिल! दोन्ही त्यांच्याजवळ भरपूर आहे. लेखन असो अथवा वाचन, दोन्ही बाजू आजही जपणारे मुसळे साहेब यांचा आज वाढदिवस! काम को अंजाम दो म्हणत ते आजही कुठे तरी कामातच व्यस्त असतील! अशा सर्वांग सुंदर माणसाला वाढदिवसाच्या लाख लाख शुभेच्छा!
