इंदापूरचा नावलौकिक उंचावण्यासाठी कामगिरी करणाऱ्या खेळाडूंना सर्वतोपरी मदत करणार : भरणे

डॉ. संदेश शहा, इंदापूर
क्रीडा क्षेत्रात वर्चस्व सिद्ध केलेल्या इंदापूरच्या गुणवंत खेळाडूंचा सन्मान राज्याचे क्रीडा व युवक कल्याण मंत्री दत्तात्रय भरणे यांच्या हस्ते भरणेवाडी येथे करण्यात आला.

३७ व्या राज्यस्तरीय सब ज्यूनिअर हँडबॉल स्पर्धेत उत्कृष्ट कामगिरी केलेल्या विद्या प्रतिष्ठानच्या पाच खेळाडूंचा देखील यावेळी सन्मान करण्यात आला.
कळंब येथील सिध्दी भीमराव जानकर हिचा ऑल इंडिया युनिव्हर्सिटी महिला व्हॉलीबॉल चॅम्पियनशीप स्पर्धेत मध्यप्रदेशात सुवर्णपदक मिळाल्याबद्दल मंत्री भरणे यांच्या हस्ते सन्मान करण्यात आला.

शेतकरी कुटुंबातील वडापूरी येथील कुमारी अमृता लालासाहेब शिर्के हिची अन्न व औषध प्रशासन सहाय्यक आयुक्तपदी निवड झाल्याबद्दल तिचा सन्मान करण्यात आला. राष्ट्रीय बेसबॉल स्पर्धेत कदम गुरुकुल मधील खेळाडूंनी चमकदार कामगिरी केली. यामध्ये शिवम मोरे या खेळाडूची टोकियो जपान या ठिकाणी झालेल्या एशियन आंतरराष्ट्रीय बेसबॉल स्पर्धेसाठी भारतीय संघाच्या बारा वर्षाखालील संघाच्या कर्णधारपदी निवड झाली.

तनया सचिन पवार, शर्वरी ज्ञानेश्वर देवकर, अस्मी नितीन राऊत, स्वरा तुषार गुजर या खेळाडूंनी छत्तीसगड मध्ये झालेल्या राष्ट्रीय बेसबॉल स्पर्धेत कांस्यपदक पटकावले असून त्यांची राष्ट्रीय सॉफ्टबॉल स्पर्धेसाठी महाराष्ट्र संघात निवड झाली आहे.

आर्या विकास चव्हाण, ओम बालाजी अडसुळे, शिवराज पांडुरंग शेरकर, यश सुरेश शिंदे, वेदांत ज्ञानेश्वर देवकर या खेळाडूंनी छत्तीसगड येथील राष्ट्रीय बेसबॉल स्पर्धेत कास्यपदक संपादन करून नेत्रदीपक कामगिरी केली. व्यंकटेश जयवंत शेटे, तनिष्क राजेंद्र शेलार, साकिब मोहम्मद सय्यद यांची दिल्ली येथे होणाऱ्या राष्ट्रीय बेसबॉल स्पर्धेसाठी १७ वर्षे वयोगटात महाराष्ट्र संघातून निवड झाली आहे.

यज्ञा अभिजीत पाटील हिची दिल्ली येथे होणाऱ्या राष्ट्रीय शालेय बेसबॉल स्पर्धेत १७ वर्षे वयोगटात निवड झाली आहे. त्यांना प्रशिक्षक सोमनाथ महादेव नलवडे यांचे मार्गदर्शन लाभले आहे. डॉ. कदम गुरुकुल संस्थेचे अध्यक्ष डॉ. एल. एस. कदम, विश्वस्त डॉ. सौ. सविता कदम यांचे मंत्री दत्तात्रय भरणे यांनी अभिनंदन केले आहे.

३७ व्या राज्यस्तरीय सब ज्युनिअर हँडबॉल स्पर्धेत विद्या प्रतिष्ठान इंदापूरच्या सिद्धी सागर गांधी, प्रणिती पोपटराव शिंदे, स्वराली महेशकुमार झगडे, हरीश दीपक डोंबाळे, तनया अमोल पाटील या खेळाडूंनी नेत्रदीपक कामगिरी करत विजय संपादन केला. सदर विजयी खेळाडू, त्यांचे मार्गदर्शक प्रशिक्षक, पालक आणि संस्थेचे मंत्री दत्तात्रय भरणे यांनी अभिनंदन केले.

यावेळी मंत्री दत्तात्रय भरणे म्हणाले, इंदापूरचा नावलौकिक उंचावणाऱ्या खेळाडूंना आंतरराष्ट्रीय, राष्ट्रीय व राज्यपातळीवर आपली कामगिरी उंचावण्या साठी सर्वतोपरी मदत केली जाईल. दरम्यान या कार्यक्रमाचे प्रास्ताविक व सुत्रसंचलन प्रशांत सिताप यांनी केले.