दौलतराव पिसाळ : महान्यूज लाईव्ह
वाई : मेणवली (ता. वाई) येथे आज पहाटे १२. ४५ च्या सुमारास दहा ते बारा जणांनी भूषण शरद कोचळे यांच्या घरावर सशस्त्र दरोडा टाकून घरातील ४ लाख ५६ हजार रुपये किमतीचे सोन्याचादीचे दागिने लुटले. याबाबत वाई पोलीस ठाण्यात गुन्हा दाखल करण्यात आला आहे. चोरट्यानी आणखीही काही घरे फोडण्याचा प्रयत्न केल्याची चर्चा आहे.
याबाबत पोलीस ठाण्यातून मिळालेली माहिती अशी की, मेणवली येथे शरद कोचळे व संतोष शरद कोचळे हे भाऊ एकत्र कुटुंबात राहतात. २७ डिसेंबर रोजी रात्री जेवण केल्यानंतर ते आपापल्या बेडरूम मध्ये झोपण्यासाठी गेले. आज पहाटे १२. ४५ च्या सुमारास संतोष कोचळे यांना घराच्या मुख्य दरवाजावर कोणीतरी जोरदार लाथ मारत असल्याचे जाणवले.
ते हॉल मध्ये गेले असता दरवाजा बाहेरून तोडण्याचा प्रयत्न करण्यात येत असल्याचे त्यांच्या लक्षात आले. त्यांनी दरवाजा दाबून धरण्याचा प्रयत्न केला. मात्र चोरट्यांनी दरवाजा तोडून आत प्रवेश केला. त्यांची पत्नी शीतल यांना व संतोष यांना धारदार सुऱ्याचा धाक दाखवत अंगावरील तसेच कपाटातील दागिने जबरदस्ती काढून घेतले.
यावेळी सात ते आठ चोरटे तोंडाला व डोक्याला रुमाल बांधून घरात शिरलेले होते. तर पाच ते सहा चोरटे घराबाहेर लक्ष ठेवून होते. दरम्यान भूषण यांना जाग आली. ते हॉलमध्ये गेले असता तीन-चार चोरट्यांनी त्यांना शस्त्राचा धाक दाखवत ओरडू नका असा दम दिला. मात्र भूषण यांनी तिथून पळून जात घराच्या मागच्या दरवाजाने बाहेर पडले. गावात जाऊन त्यांनी इतर लोकांना सावध करत झालेली घटना सांगितली.
गावातील दहा पंधरा लोक मिळून काही वेळातच घराकडे आले, मात्र तोपर्यंत घरातील सर्वसामान अस्ताव्यस्त पडलेले त्यांना दिसून आले. तसेच घरातील सोन्या चांदीचे सुमारे ४ लाख ५६ हजार रुपयांचे मौल्यवान दागिने चोरले होते. यावेळी ग्रामस्थांनी ग्राम सुरक्षा यंत्रणेला संदेश पोहोचवला. थोड्याच वेळामध्ये भोंगा वाजून ग्रामस्थांना सावधतेचा इशारा दिला.
काही तरुणांनी दुचाकीवरून चोरट्यांचा पाठलाग करण्याचाही प्रयत्न केला. मात्र त्यात त्यांना अपयश आल्याचे समजते. सदर घटनेची माहिती वाई पोलिसांना समजताच त्यांनी त्वरित घटनास्थळी धाव घेतली. तसेच तज्ञांचे पथक रात्रीच बोलावण्यात आले होते. या घटनेमुळे मेणवली व पंचक्रोशीतील गावांमध्ये घबराटीचे वातावरण पसरले आहे. अधिक तपास वाई पोलीस करीत आहेत.
