बारामती : महान्यूज लाईव्ह
बारामतीतील क्रिएटिव्ह अकॅडमी ते तुळजाराम छत्रपती रस्त्यावर रात्री अकरा वाजण्याच्या सुमारास 23 वर्षीय युवकाचा कोयत्याने निर्घृण वार करत खून करण्यात आला. या प्रकरणाने बारामती हादरली आहे. गेल्या सहा महिन्यातील हा तिसरा खुनाचा प्रकार आहे.
पोलिस सूत्रांनी दिलेल्या माहितीनुसार, रात्री साडेदहा ते अकरा वाजण्याच्या सुमारास प्रगतीनगर परिसरातील क्रिएटिव्ह अकॅडमी ते तुळजाराम चतुरचंद कॉलेज रस्त्यावर अनिकेत सदाशिव गजाकस या युवकाचा कोयत्याने वार करण्यात आले. यामध्ये गंभीर जखमी झाल्याने अनिकेत गजाकस याचा मृत्यू झाला. प्राथमिक माहितीनुसार मुलीशी बोलत असल्याच्या कारणावरून हा प्रकार घडल्याचा संशय आहे.
या प्रकरणी पोलिसांनी तिघांविरोधात गुन्हा दाखल केला आहे. नंदकिशोर पंजाबराव अंभोरे रा प्रगतीनगर ता बारामती जि पुणे 2) महेश नंदकुमार खंडाळे रा. तांदुळवाडी रोड जिजामातानगर बारामती जि पुणे 3) संग्राम खंडाळे (पुर्ण नाव पत्ता माहीती नाही) अशी या आरोपींची नावे आहेत.
याप्रकरणी अभिषेक सदाशिव गजाकस यांनी बारामती शहर पोलिसांकडे फिर्याद दिली असून, पोलिसांनी तिघेजणांविरोधात गुन्हा दाखल केला आहे. पुढील तपास सहाय्यक निरीक्षक गजानन चेके करत आहेत.
