राजेंद्र झेंडे,महान्युज लाईव्ह
दौंड : दौंड विधानसभा मतदारसंघाचे भारतीय जनता पार्टी व महायुतीचे उमेदवार ॲड. राहुल सुभाष कुल यांच्या प्रचाराची सांगता सभा दौंड तालुक्यातील वरवंड येथे आयोजित करण्यात आली आहे. राज्याचे उपमुख्यमंत्री देवेंद्र फडणवीस हे या सभेला मार्गदर्शन करणार आहेत.
महायुतीचे उमेदवार राहुल कुल यांनी मागील महिनाभरापासून मतदारसंघात घोंगडी बैठका आणि कोपरा सभा घेऊन प्रचार केला. राहुल कुल यांना विविध सामाजिक आणि राजकीय संघटनांनी पाठिंबा दिल्याने कुल यांची ताकद वाढली आहे. राहुल कुल यांच्या ठिकठिकाणी झालेला प्रचारसभेला मतदारांची गर्दी होती आणि चांगला प्रतिसाद पाहायला मिळाला. भाजपचे स्टार प्रचारक आणि राहुल कुल यांच्या पत्नी कांचन कुल यांनीही महिला आघाडीच्या कार्यकर्त्यांना सोबत घेऊन मतदार संघ पिंजून काढला.
महिन्यांपासून सुरू असलेल्या प्रचाराची सांगता सभा ही वरवंड येथील बाजार मैदानात सोमवारी (दि १८) सकाळी ९ वाजता होणार आहे. राज्याचे उपमुख्यमंत्री आणि महायुतीचे नेते देवेंद्र फडणवीस हे या सभेला मार्गदर्शन करणार आहेत. दरम्यान रविवारी पार पडलेल्या रमेश थोरात यांच्या सांगता सभेत शरद पवार यांनी भीमा पाटस कारखाना, तालुक्यातील शैक्षणिक परिस्थिती बाबत भाष्य केले होते.
त्यामुळे आज देवेंद्र फडवणीस हे काय बोलणार याकडेही मतदारसंघातील विविध राजकीय पक्षांचे पदाधिकारी आणि कार्यकर्त्यांचे लक्ष लागले आहे. दरम्यान, वरवंड येथील देवेंद्र फडणवीस यांच्या सभेला मतदारसंघातील मतदारांनी व महायुतीच्या सर्व पदाधिकारी व कार्यकर्त्यांनी मोठ्या संख्येने उपस्थित राहण्याचे आवाहन महायुतीकडून करण्यात आले.
