राजेंद्र झेंडे, महान्यूज लाईव्ह
दौंड : दौंड विधानसभेची जागा महायुतीतील भाजप पक्षाच्या वाटेला गेली आहे. भाजपने दोन दिवसांपूर्वीच विद्यमान आमदार राहुल कुल यांना उमेदवारी जाहीर केली होती. मात्र आता महायुतीत मोठी बंडाळी होते की काय अशी चर्चा सुरू झाली आहे. कारण अजित पवार यांचे खंदे समर्थक म्हणून ओळखले जाणारे दौंड शुगरचे संचालक वीरधवल जगदाळे यांनी पहिल्याच दिवशी उमेदवारी अर्ज घेतला आहे.
त्यामुळे महायुतीत खळबळ उडाली आहे. दरम्यान पहिल्याच दिवशी दौंड विधानसभेसाठी ४० उमेदवारी अर्जाची विक्री झाली आहे. अशी माहिती दौंड विधानसभा निवडणूक निर्णय अधिकारी मिनाजी मुल्ला व सहाय्यक निवडणूक निर्णय अधिकारी अरुण शेलार यांनी दिली. विधानसभा निवडणुकीसाठी मंगळवारी (दि २२) अर्ज वाटप करण्याची प्रक्रिया सुरू झाली. दौंड विधानसभेसाठी नवीन प्रशासकीय इमारतीत अर्ज वाटप करण्याची निवडणूक निर्णय अधिकारी मिनाज मुल्ला यांच्या मार्गदर्शनाखाली सुरू आहे.
दौंड विधानसभेसाठी पहिल्याच दिवशी मंगळवारी (दि २२) दिवसभरात २० जणांनी ४० उमेदवारी अर्ज घेतले. दौंड विधानसभेची जागा ही महायुतीतील भाजप या घटक पक्षाला गेली आहे. भाजपने विद्यमान आमदार राहुल कुल यांना दुसऱ्यांदा उमेदवारी दिली आहे. आमदार कुल यांच्या समर्थकांनी या उमेदवारीचे जोरदार स्वागत केले होते. तर दौंडची जागा अजित पवार यांच्या राष्ट्रवादी काँग्रेसचीच आहे असा दावा अजित पवार यांचे खंदे समर्थक आणि दौंड शुगरचे संचालक वीरधवल जगदाळे यांनी काही दिवसांपूर्वी केली होती.
ही जागा राष्ट्रवादी काँग्रेसला देण्यात यावी अशी मागणी त्यांनी केली होती. आज अर्ज वाटपाच्या पहिल्या दिवशी जगदाळे यांचा नावाचा उमेदवारी अर्ज गेला आहे. त्यामुळे वीरधवल जगदाळे हे महायुतीतून बंडखोरी करणार अशीच चर्चा राष्ट्रीय वर्तुळात आहे. जगदाळे यांच्या बंडामुळे भाजपचे उमेदवार राहुल कुल हे अडचणीत सापडले आहेत. दरम्यान अजित पवार हे जगदाळे यांची नाराजी दूर करणार का? हा प्रश्न निर्माण झाला असून अजित पवार यांच्या भूमिकेकडे महायुतीतील घटक पक्षाचे लक्ष लागले आहे.
